لښکرګاه (پژواک ۲۷تله ۹۳): په هلمند ولايت کې ځيني دولتي ادارو له تېرو درېيو کلونو راهيسې د برېښنا لګښت نه دى ورکړى او سل ميليونه افغانۍ پوروړې دي.
د دغه ولايت د برېښنا رياست مرستيال انجنير نصرت الله قانع پژواک اژانس ته وويل چې د ولايت مقام په ګډون يو شمېر دولتي ادارې له تېرو درېيو کلونو راهيسې د برېښنا لګښت نه دى ورکړى او دغه کار لامل شوى د رياست پر چارو منفي اغېز وکړي.
د قانع په خبره چې يوازې لږ شمېر دولتي ادارې د دوى پور ورکوي خو ډېرې يې د رسمي مکتوب ور لېږلو هم پور نه ورکوي.
هغه وويل که دا پورونه ور نه کړل شي ښايي د بودجې له کسر سره مخ شي خو هغه د ولايت مقام او عامې روغتيا له رياست پرته د نورو پوروړو ادارو نومونه وانه خيستل.
د هلمند سرپرست والي تورن جنرال محمدنعيم مني چې د ولايت مقام په ګډون ځينو ادارو د برېښنا پورونه نه دي ورکړي خو ويې ويل، تر اوسه د برېښنا لپاره دوى ته بوديجه نه ده ورکړل شوې
د ده په وينا، دې ستونزې ته دې د مرکزي دولت له خوا د حل لاره ولټول شوي.
سرپرست والي دا هم وويل، يو شمېر ادارې له تېرو ۱۳ کلونو راهيسې د برېښنا رياست پوروړي دي چې اوس د پور ورکولو توان نه لري.
د لښګرګاه ښار اوسېدونکي عبدالله پژواک اژانس ته وويل چې دولتي ادارې بايد د برېښنا مصارف ورکړي؛ ځکه چې دا پيسې د دولت بوديجې ته ځي.
هغه وويل چې ولس د برېښنا د لګښت بېلونه ورکوي نو دولت يې بايد ولې ورنه کړي؟
هلمند ١٦ ميګاواټه برېښنا لري چې د چارواکو په وينا د دغه ولايت پر يو شمېر ولسواليو سربېره يې يوه اندازه کندهار ولايت ته هم لېږدول شوې ده.
په هلمند کې د کجکي او ګرشګ د برېښنا بندونه د ٣٣ ميګاواټه برېښنا د توليد ظرفيت لري خو موده مخکې د کجکي د يوه توربين د خرابېدو له امله دغه ظرفيت اوس ١٦ ميګاواټه ته راټيټ شوى دى.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن