کندوز (پژواک ٣ لړم ٩٣): د کندوز ولايت د دشت ارچي او امام صاحب ولسوالۍ ځايي چارواکي خبر ورکوي چې د دغو دوو ولسواليو د سقوط احتمال شته، خو سيمه ييز امنيتي چارواکي وايي چې ډېر ژر به ځپل شوې سيمې له وسله والو مخالفينو پاکې کړي.
د دشت ارچي ولسوال نصرالدين نظري پژواک خبري اژانس ته وويل چې په دې وروستيو کې په دې ولسوالۍ کې وضعيت خراب شوى او وسله والو طالبانو د دې ولسوالۍ ٩٠ سلنه برخې نيولې دي.
هغه زياته کړه چې اوسمهال د کورنيو او بهرنيو طالبانو شمېر څه باندې ٦٠٠ کسه کېږي چې مشري يې د ٥٥ ځايي سرګروپانو پر غاړه ده.
نظري خبردارى ورکړى چې که چېرې تر څو نورو ورځو پورې دې ولسوالۍ ته پاملرنه ونه شي، نو لرې نه ده چې د طالبانو لاس ته ولوېږي.
د دشت ارچي ولسوال وايي چې دغه اندېښنه يې د کندوز ولايت له چارواکو او کورنيو چارو وزارت سره شريکه کړې، خو تر اوسه په دې اړه اقدام نه دى شوى.
ځايي اوسېدونکي هم د امنيتي وضعيت د خرابېدو په اړه اندېښنه څرګندوي.
د دشت ارچي يوه اوسېدونکي عصمت الله وويل چې څو ورځې وړاندې امنيتي ځواکونو ويلي وو چې ارچي يې د طالبانو له شتون څخه چاڼ کړي، خو اوس ليدل کېږي چې په دغه ولسوالۍ کې طالبان په پراخه بڼه فعاليت لري.
هغه زياته کړه: ((خلک دا ډول نمايشي او دستوري عملياتو ته ضرورت نه لري، حکومت بايد د طالبانو د ځپلو لپاره کره او منطم پلان جوړ کړي.))
بلخوا د امام صاحب ولسوال امان الدين قريشي د امام صاحب ولسوالۍ د امنيتي وضعيت له نازکوالي اندېښنه څرګندوي او وايي چې اوسمهال د چيچين، ازبکستان او تاجکستان د وګړو په ګډون د وسله طالبانو شمېره څه باندې ٧٠٠ کسانو ته رسېږي اود ولسوالۍ د نيولو هڅه کوي.
هغه وويل چې کلباد کلى د طالبانو په واک کې دى او له امنيتي ځواکونو سره يې سختې نښتې دوام لري.
د امام صاحب ولسوال وويل چې ددې ولسوالۍ په تاشګذر او لقي ها سيمه کې د وروستيو دوو ورځو نښتو له امله ٩ طالبان، پنځه پوليس او د ملي اردو سرتېري وژل شوي او ١٣ طالبان او اته پوليس ټپيان دي.
نوموړي زياته کړه:((د طالبانو د فعاليت ساحه پراخه شوې او که چېرته مرستندوى ځواکونه تر څو ورځ، پورې دغه ولسوالۍ ته ونه لېږل شي؛ د طالبانو لاس ته به ولوېږي.))
خو ددې ولايت د امنيه قوماندانۍ وياند سيدسرور حسيني وايي چې د ولايت ټولې سيمې د امنيتي ځواکونو په واک کې دي او ډېر ژر په د ځپل شوو ولسواليو او مرکز کې دولت د وسله والو مخالفينو پر ضد ځمکني او هوايي عمليات پيل کړي.
حسيني مني چې په دې وروستيو کې ددې ولايت په ځينو برخو کې د طالبانو فعاليتونه زيات شوي، خو پر وړاندې يې امنيتي ځواکونه هم پلانونه لري.
دشت ارچي او امام صاحب سره ګډه پوله لري او په وروستيو کلونو کې په کې د طالبانو وسله وال فعاليتونه تر سترګو شوي او طالبان ادعا کوي چې ددې ولسواليو ځينو سيمې يې نيولې او امنيتي ځواکونو ته يې زيانونه اړولي دي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن