هرات ښار ( پژواک، د ليندۍ لومړۍ نېته ٩٣ ) : د هرات ولايتي شورا غړو که څه هم تراوسه د لوړې مراسم نه دي ترسره کړي، خو خپل کارونه يې په رسمي توګه پيل کړل.
د هرات والي سيد فضل الله وحيدي دليندۍ په لومړۍ نېټه، د ولايتي شورا د کار د پيل پر مهال خبريالانو ته وويل، چې د لوړې مراسم د هغو ستونزو له امله ځنډېدلي چې د معترضو کانديدانو له خوا رامنځته شوې دي.
هغه زياته کړه، چې د ولايتي شورا اداري پلاوى پخوا ټاکل شوى او نن يې په رسمي توګه خپل کارونه پيل کړل.
دى وايي چې د ولايتي شورا د معترضو کانديدانو عريضې د هرات څارنوالۍ ته لېږل شوي او هغوى به يې په اړه پرېکړه کوي.
وحيدي ددغو معترضو کانديدانو د هغه اقدام ستاينه وکړه، چې خپلې خېمې يې د ولايتي شورا له ودانۍ څخه لرې کړي او ډاډ يې ورکړ، چې د هغوى شکايتونه به وڅېړل شي.
د هرات د استيناف څارنوالۍ مشره ماريا بشير وايي چې د هرات د ټاکنو خپلواک کمېسيون له ځايي دفتر سره د معترضو کانديدانو د دوسيو په اړه يې خبرې پيل کړې دي.
نوموړې زياته کړې،د ولسمشر له خوا د ولايتي شوراګانو د معترضو کانديدانو دوسيې څارنوالۍ ته لېږل شوي او دوى به ورته رسيدګي وکړي.
د هرات ولايتي شورا چې ١٩ غړي لري،د اداري پلاوي ټاکنې يې تېره اونۍ ترسره شوې چې کامران عليزى د ١٥ رايو په ترلاسه کولو سره رييس، توريالى طاهري مرستيال او مېرمن سکينه حسيني د منشي په توګه وټاکل شول.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن