کندهار (پژواک، ٢ لېندۍ ٩٣): د کندهار ولايت په هوايي ډګر کې دوه قاچاقبر چې غوښتل يې هندوستان ته هيرويين قاچاق کړي، د پوليسو له خوا نيول شوي دي.
د کندهار د والي وياند صميم خپلواک د لېندۍ په ٢مه پژواک خبري اژانس ته وويل چې ياد کسان له نشه يي توکو سره د مبارزې پوليسو نيولي دي.
هغه زياته کړه، نيول شوو ۱۲۵۰ ګرامه هيرويين په ځانګړو کپسولونو کې خپلو ګېډو ته تېر کړي وو او غوښتل يې هندوستان ته يې ولېږدوي.
دى وايي چې ياد کسان له نشه يي توکو سره د مبارزې د پوليسو د اوپراتيفي معلوماتو پر اساس ونيول او اوس تر پوښتنو ګروېږنو لاندې دي.
د يادونې ده، تر دې مخکې هم د کندهار او کابل هوايي ډګرونو له لارې هندوستان ته د نشه يي توکو د قاچاق هڅه شوې، خو د پوليسو له خوا يې مخه نيول شوې ده.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن