مهترلام (پژواک، ٩ سلواغه ٩٣): د لغمان ولايت په مرکز مهترلام ښار کې د يوې چاودنې له امله يو پوليس او درې ملکي وګړي وژل شوي دي.
د لغمان د والي وياند سرحدي ځواک د سلواغې په ٩مه پژواک خبري اژانس ته وويل چې دا چاودنه نن سهار شاوخوا اته نيمې بجې د ولايت د مرکز مهترلام اړوند د مصري کلا په سيمه کې شوې ده.
هغه زياته کړه چې چاودېدونکي توکي د سړک پر غاړه ځاى پر ځاى شوي وو او د پوليسو پر يوه موټر چاودېدلي دي.
ځواک وايي چې په دې چاودنه کې يو پوليس او درې ملکي وګړي وژل شوي دي.
دى وايي چې پوليس په سيمه کې د دې چاودنې په اړه څېړنې پيل کړې او په تور يې يو شکمن تن نيولى دى.
د لغمان سرپرست والي ډاکتر فضل الله مجددي دغه چاودنه غندلې ده.
وسله والو مخالفينو تر اوسه د دې چاودنې په اړه څه نه دي ويلي.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن