جلال اباد ( پژواک، ٩ سلواغه ٩٣ ) : ناپېژاندو وسله والو په ننګرهار کې يو ښوونځى پر بمونو الوځولى او بل يې زيانمن کړى دى.
د ننګرهار د پوهنې رياست وياند محمداصف شينواري د سلواغې په ٩مه پژواک خبري اژانس ته وويل چې دا پېښه تېره شپه په هسکه مېنه ولسوالۍ کې رامنځته شوې ده.
هغه زياته کړه چې د علم او پوهې دښمنانو د يادې ولسوالۍ د شپلۍ د نجونو ښوونځي د ساتونکو سترګې تړلې او بيا يې له ودانۍ بهر پر سړک اچولي وو.
د نوموړي په وينا، وروسته وسله والو د ياد ښوونځي ودانۍ پر بمونو الوځولې او ويجاړه کړې يې ده.
شينواري وويل چې وسله والو د ياد ښوونځي تر څنګ د همدې سيمې د هلکانو د لېسې د ودانۍ هندارې او ا لمارۍ هم مات کړي او دفتري اسناد يې شيندلي دي.
نوموړي زياته کړه چې وسله وال تر يادو کړنو وروسته له سيمې تښتېدلي دي.
تر اوسه کومې ډلې د دغه بريد مسووليت نه دى اخيستى.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن