کابل (پژواک ١٠ سلواغه ٩٣): د کابل په هوايي ډګر کې يوتن چې د افغان امنيتي ځواکونو يونيفورم يې پر تن و درې قراردادي امريکايان ووژل .
د کابل د هوايي ډګر د سرحدي پوليسو قوماندان پاسوال حق نواز حق یار پژواک اژانس ته وويل چې دغه پېښه تېر ماخوستن اوه بجې د ياد هوايي ډګر په هغه ساحه کې رامنځته شوه ، چې د ملي دفاع وزارت د هوايي ځواکونو اړونده ده .
ده وويل چې يوه افغان ساتونکي درې امريکايي قرارداديان پر ډزو ووژل .
د نوموړي په وينا ، چې د لومړنيو معلوماتو په اساس په دې بريد کې يو افغان هم وژل شوى ، خو تراوسه يې بشپړ هويت نه دى په ډاګه شوى .
ملي دفاع وزارت تراوسه پورې په دې اړه څه نه دي ويلي .
يوې امريکايي ورځپاڼې US TODAY په افغانستان کې د ناټو ځواکونو د وياند ډګروال براین تریبس (Col. Brian Tribus) له قوله ويلي ، چې په دې بريد کې درې امريکايان وژل شوي او يو بل ټپي دى .
د ناټو وياند زياته کړې چې د بريد پرمهال يو افغان هم وژل شوى ، خو دا يې نه ده په ډاګه کړې چې وژل شوى افغان بريدکوونکى و او که د افغان امنيتي ځواکونو کوم بل غړى .
د وسله والو طالبانو له خوا پژواک اژانس ته په رالېږل شوې خبرپاڼه کې ويل شوي ، چې ياد بريد د دوى د ډلې د يوه غړي له خوا تر سره شوى دى.
په دې خبرپاڼه کې د دوى د ډلې د يوتن وياند ذبيح الله له خولې ويل شوي ، چې ياد بريدکوونکى احسان الله نومېده او د لغمان ولايت د دولت شاه ولسوالۍ اوسېدونکى و .
طالب وياند زياته کړې چې دغه بريد کوونکى د افغان امنيتي ځواکونو له لوري وژل شوى دى.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن