کابل (پژواک، ١٢ سلواغه ٩٣): په کابل کې د صحت طفل روغتون ډاکټران وروسته له هغه کاربنديز اعلان کړ چې يو شمېر کسانو د روغتون يو ډاکټر وواهه.
دغه ټکى د دغه روغتون رييس ډاکټر نورالحق يوسفزي پژواک خبري اژانس ته څرګند کړ.
نوموړي وويل چې تېره شپه يو ماشوم د مغزي وينې بهېدنې له امله په دغه روغتون کې ساه ورکړه چې ورپسې د ماشوم درې خپلوان راغلل، يو ډاکټر يې وواهه او د روغتون د يوې خونې ښيښې يې ماتې کړې.
هغه وويل چې هر ناروغ بايد يو پايواز ولري او د دې درېيو کسانو له ډلې، دوو يې د اصولو خلاف شپه د روغتون دننه تېره کړې ده.
هغه وويل چې له همدې امله د دغه روغتون ډاکټرانو له نن سهار راهيسې کار بنديز اعلان کړى او د وهل شوي ډاکټر د حيثيت اعادې غوښتنه کوي.
د يوسفزي په خبره، ډاکټران وايي دغه درې کسان چې ډاکټر يې وهلى، بايد بښنه وغواړي.
نوموړى چې د يکشنې په ورځ (د سلواغې ١٢مه) يې له غرمې وړاندې په يوولس نيمې بجې خبرې کولې، وويل چې د معالجوي طب رييس او د عامې روغتيا وزارت د روغتونونو رييس روغتون ته ورغلي او په دې اړه له ډاکټرانو سره خبرې کوي، څو د هغوى کاربنديز ته د پاى ټکى کيږدي.
هغه وويل چې اعتصاب کوونکو هم منلې چې د ژور روغتيايي وضعيت لرونکو ناروغانو درملنه به هم کوي.
د هغه په خبره، هغه درې کسان چې د دغه روغتون ډاکټران يې وهلي ډبولي، نيول شوي او له پوليسو سره دي.
په کابل کې د صحت طفل روغتون د هېواد په کچه د ماشومانو لپاره تر ټولو ستر روغتون دى.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن