کابل ( پژواک، ١٥ سلواغه ٩٣ ) : د پاکستان د ملي امنيت سلاکار سرتاج عزيز وايي چې چين د افغانستان د حکومت او وسله والو طالبانو ترمنځ د سولې خبرو اترو لپاره د خپل کوربه توب وړانديز کړى دى.
خو وسله والو طالبانو لا دمخه د چين د منځګړيتوب خبره رد کړې ده.
د پاکستان د لومړي وزير نواز شريف د ملي امنيت او بهرنيو چارو سلاکار سرتاج عزيز له پاکستانيو رسنيو سره په يوه مرکه کې په ډاګه کړې، چې چين د افغان حکومت او طالبانو ترمنځ د سولې د خبرو اترو د کوربه توب وړانديز کړى دى.
نوموړي زياته کړې، چې په دې برخه کې وروستۍ پرېکړه بايد افغان حکومت وکړي، خو ويلي يې دي چې پاکستان په دې برخه کې د خپل رول ادا کولو ته چمتو دى.
تر دې مخکې ځينو غربي او د چين رسنيو خبر ورکړى و، چې چين د افغان حکومت او وسله والو طالبانو ترمنځ د منځګړيتوب وړانديز کړى دى.
خو وسله والو طالبانو تېره اونۍ د يوې خبرپاڼې په خپرولو سره د چين د منځګړيتوب خبره رد کړې ده.
هغوى منلې وه، چې يوه پلاوي يې چين ته سفر کړى، خو زياته کړې يې وه چې د چين ترڅنګ ځينو نورو هېوادونو هم دا ډول وړانديزونه کړي دي.
بلخوا د اېکسپريس په نامه يوې پاکستانۍ رسنۍ خبر ورکړى، چې د متحده عربي اماراتو په دوبۍ کې ښار کې د افغان حکومت او طالبانو ترمنځ خبرې اترې شوې دي.
سرچينې زياته کړې چې په دې خبرو اترو کې د طالبانو له لوري پخوانيو وزيرانو ملا ګل اغا، ملا عباس او ملا جليل برخه اخيستې وه.
خو وسله والو طالبانو هغه خبرونه رد کړل، چې ګواکې د دوى استازو د افغانستان له حکومت سره په دوبۍ کې د سولې خبرې کړې دي.
د دې ډلې يوه وياند قاري يوسف احمدي پژواک خبري اژانس ته په رالېږل شوې خبرپاڼه کې د ځينو رسنيو له خوا خپاره شوي دا ډول خبرونه رد کړي .
په خبرپاڼه کې زياته شوې، دوى دا ډول خبرونه په کلکه ردوي او وايي چې هېڅ يوه استازي يې د حکومت له کوم پلاوي سره نه په دوبۍ ښار کې او نه په کوم بل ځای کې ليدلي دي.
سرچينې دا ډول اوازې د ځينو مغرضو کړيو له خوا بللې دي.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن