نيلي(پژواک، ۸ کب ۹۳):د دايکنډي ولايت چارواکي وايي ، چې په دغه ولايت کې د يوې ترافيکي پېښه له امله اته تنه مړه شوي او څلور نور ټپيان دي.
د دايکندي د ميرامور ولسوالۍ ولسوال سید محمد هاشمي د کب په ٨مه پژواک اژانس ته وويل چې دغه پېښه نن سهار هغه مهال رامنځته شوه چې کله يو فلاينکوچ موټر له يادې ولسوالۍ څخه د ولايت مرکز (نيلي) ته د حرکت په حال و .
هغه وويل چې ياد موټر د ولسوالۍ په تخاوي سيمه کې د سړک د خرابوالي له امله چپه شوى دى .
ده زياته کړه چې په دې پېښه کې د موټر اته سپرلۍ مړې شوې او څلور نورې ټپيانې دي ، چې د دوو تنو ټپيانو روغتيايي حالت نازک دى .
د ولسوال په وينا، چې د پېښې ټپيان د سيمې د خلکو په مرسته د نيلي روغتون ته لېږدول شوي دي.
د نوموړي په خبره ، چې د وروستۍ واورې ورېدو له امله د يادې ولسوالۍ سړک ډير خراب شوى او موټر په دير مشکل سره پرې تګ راتګ کوي .
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن