کابل(پژواک، ١١ ورى ٩٤): د ملي امنيت عمومي رياست وايي چې د طالبانو يو قوماندان يې په کابل ښار کې نيولى دى.
ددغه رياست له خوا نن( د وري ١١مه) پژواک خبري اژانس ته په يوه را استول شوې خبرپاڼه کې راغلي چې دغه تن حميدالله نومېده چې په ضابط حميد مشهور و.
په خبرپاڼه کې ويل شوي چې ياد شوي تن د غزني، پکتيکا ولايتونو او کابل ښار په بېلابېلو ويجاړوونکو او ترهګريزو فعاليتونو کې فعاله ونډه درلوده.
سرچينې همدارنګه زياته کړې چې قوماندان حميدالله د طالبانو له خوا کابل ته د بهرنيو وګړو د ترور په موخه را استول شوى و.
په خبرپاڼه کې زياته شوې چې دغه قوماندان د کابل ښار د پنځمې امنيتي حوزې په مربوطاتو کې د ملي امنيت ځواکونو سره تر مخامخ نښتې وروسته نيول شوى دى.
د ملي امنيت رياست د نيول شوي تن د نيول کېدو وخت نه دى په ډاګه کړى، خو ويلي يې دي چې نوموړي د څېړنو پرمهال پر خپل جرم اعتراف کړى دى.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن