کلات (پژواک، ١٢ ورى ٩٤): د زابل د مرکز کلات ښار د څلورو ښوونځيو لپاره د لوبو د لوبغالو جوړولو چارې پيل شوې.
په دغه ولايت کې د سيمه ييز ثبات (سيکا) موسسې يوه مسوول کمال احمد د وري په ۱۲مه پژواک خبري اژانس ته وويل چې د دوى اداره د پوهنې تر څنګ له نورو دولتي ادارو سره هم کار کوي تر څو د دولت او ولس تر منځ اړيکې پياوړې شي.
هغه زياته کړه چې په اوسنۍ پروژه کې د کلات ښار اړوند د شيخ مټي، بي بي خالا، کنډک د لېسو او عالي دارالعلوم لپاره ورزشي ميدانونه جوړېږي چې چارې به يې د يوې مياشتې په ترڅ کې بشپړې شي.
د ده په خبره چې د دې پروژې چارې به د يوه کورني شرکت له لوري د څه باندې پنځه ميليونه افغانيو په لګښت مخې ته وړل کېږي.
کمال احمد وايي چې د پروژې له پلې کېدو سره به د لوبغالو جوړېدو تر څنګ لسګونه وزګارو خلکو ته کار هم پيدا شي.
دغه راز د زابل د پوهنې رييس رحيم الله لودين پژواک اژانس ته وويل چې د مناسبو لوبغالو نه شتون د زده کوونکو يوه لويه ستونزه وه او جوړېدو ته يې سخته اړتيا وه.
نوموړي د ثبات له سيمه ييز پروګرامه مننه وکړه چې د لوبو تر څنګ يې د پوهنې د رياست له نورو برخو سره هم مرسته کړې ده.
د شيخ مټي فوټبال لوبډلې مشر محمدايوب پژواک ته وويل چې په تېرو ١٣ کلونو کې په زابل کې د ورزش برخې ته ځانګړې پاملرنه نه ده شوې او دوى تر اوسه هېڅ معياري لوبغالی نه درلود.
نوموړي د سيکا له موسسي د منني په ترڅ کې وويل چې دولت او نورې مرستندويې ادارې بايد د ورزش برخې ته پاملرنه زياته کړي.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن