په کابل ښار کې دوه ملکي وګړي ووژل شول

کابل (پژواک، ٢٥ ورى ٩٤): نن سهار د کابل ښار د يوولسمې امنيتي حوزې اړوند ساحه کې دوه ملکي وګړي د ناپېژانده وسله والو له خوا بر ډزو ووژل شول.

د کورنيو چارو وزارت د ١١٩ پوليسو مشر مل پاسوال همايون عيني د سې شنبې په ورځ پژواک خبري اژانس ته وويل چې ياده پېښه نن (وري ٢٥مه) د سهار ٩ بجې د يوولسمې امنيتي حوزې اړوند د عمر فاروق (رض) جومات ته څېرمه رامنځته شوه.

عيني وويل چې بريدګر په يو بې نمبر پلېټه هايلکس موټر کې سپاره وو او د کرولا موټر دوه سپاره يې پر ډزو وژلي دي.

سرچينې زياته کړه چې بريدګرو ملکي جامې اغوستې وې او له بريد وروسته تښتېدلي دي.

د کورنيو چارو وزارت د ١١٩ پوليسو د مشر په وينا، دا دوه ملکي وګړي د کابل ولايت د شکردرې ولسوالۍ اوسېدونکي دي چې مړي يې عدلي طب ته لېږدول شوي دي.

په ورته وخت کې يوه امنيتي چارواکي  چې د نوم له اخيستو يې ډډه کوله، وويل چې په دې اړه د کابل پوليسو څېړنې پيل کړې دي.

د دې پېښې مسووليت تر اوسه چا پر غاړه نه دى اخيستى.

login or register a new account.