هرات، کلات، محمود راقي ( پژواک، ٢٦ ورى ٩٤ ) : په درېيو ولايتونو کې د بېلا بېلو امنيتي پېښو پر مهال ٩ سرتېرو ته مرګ ژوبله اوښتې او څلور وسله وال وژل شوي.
د هرات ولايت چارواکي وايي چې په ادرسکن ولسوالۍ کې ديوې چاودنې له امله يو پوليس وژل شوى او پنځه نور ټپيان شوي دي.
د ادرسکن ولسوال حکمت الله حکمت د وري په ٢٦مه، پژواک خبري اژانس ته وويل چې دا چاودنه تېر ماښام د شينډ ولسوالۍ پر لويه لا ره د خواجه عوريا په سيمه کې د پوليسو پر يوه رېنجر موټر شوې ده.
د سرچينې په وينا، ټپي پوليس روغتون ته لېږدول شوي او د هغوى روغتيايي حالت د ډاډ وړ ښودل شوى دى.
د يوه بل خبر له مخې ، په کاپيسا ولايت کې ديوې چاودنې له امله د ملي اردو درې سرتېري ټپيان شوي دي.
د کاپيسا امنيه قوماندان مل پاسوال خواجه فقير احمد صديقي پژواک ته وويل،تېره شپه اله ساى ولسوالۍ ته اکمالات کېدل، چې پر لاره د تګاب ولسوالۍ دشکوټ په سيمه کې د ملي اردو پر ځواکونو چاودنه شوې ده.
د هغه په وينا، چاودېدونکي توکي په يوه ونه کې ځاى پر ځاى شوي وو او د چاودنې له امله درې سرتېري ټپيان شوي دي.
بله خوا د زابل امنيتي چارواکي وايي چې د امنيتي ځواکونو له لوري په ترسره شويو عملياتو کې څلور تنه د دولت وسله وال مخالفين وژل شوي او يوه اندازه وسلې او مهمات يې ترلاسه شوي.
ددې ولايت امنيه قوماندان مل پاسوال غلام سخي روغ لېوني پژواک اژانس ته وويل چې دواړه عمليات تېره ورځ مازيګر د شهرصفا ولسوالۍ د خواجه بابا او ارهډ مانده په سيمو کې ترسره شوي دي.
وسله والو طالبانو تر اوسه ددې پېښو په اړه رسنيو ته څه نه دي ويلي ، خو د دوى وياند قاري يوسف احمدي وايي چې تېره ورځ يې د زابل په بېلا بېل ولسواليو کې تر لسو زيات دولتي عسکر وژلي دي.
خو د زابل چارواکي دا ادعا نه تاييدوي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن