کوېټه (پژواک، ١٢ زمرى ٩٤): راپورونه وايي چې ناپېژاندو وسله والو د پاکستان په بلوچستان ايالت کې د طالبانو د نوي مرستيال مشر پر کاروان بريد کړى، خو هغه ترې روغ وتلى دى.
په کوېټه کې طالبانو ته يوې نږدې سرچينې د زمري په ١٢مه پژواک خبري اژانس ته وويل چې دغه بريد د طالبانو د نوي مشر ملا منصور پر مرستيال مولوي هيبت الله نورزي د موټرو پر کاروان شوى دى.
سرچينې زياته کړې چې په دغه کاروان کې د نورو طالب استازو تر څنګ د طالبانو بل مرکزي مشر او د ننګرهار پخوانى والي مولوي عبدالکبير هم شتون درلود.
يادې سرچينې وويل چې دغه بريد پرون له غرمې وروسته د بلوچستان ايالت اړوند د چمن ښار اړوند د پاى پاس او ښار تر منځ پر سړک شوى دى.
طالبانو ته نږدې دغې سرچينې وويل چې د طالبانو مرستيال امير مولوي هيبت الله او مولوي عبدالکبير له دغه بريده روغ وتلي دي، خو درى ملګري يې ژوبل شوي دي.
د سرچينې د معلوماتو له مخې، يادو طالب مشرانو ځايي مدرسو ته د ملا منصور لپاره د بيعت اخيستلو په موخه روان و، چې تر بريد لاندې راغلل.
د يادونې ده، چمن د ملا عبدالرزاق پلرنۍ سيمه ده او ګڼ پلويان په کې لري، ملا عبدالرزاق د ملا منصور له ټاکل کېدو سره مخالفت ښودلى دى.
ملا منصور تېره اوونۍ د ملا عمر تر مړينې وروسته د طالبانو د نوي مشر يا امير په توګه ټاکل شوى دى، خو يو شمېر مهمو طالب مشرانو له نوموړي سره مخالفت څرګند کړى دى.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن