خوست ښار ( پژواک، ١٣ زمرى ٩٤ ) : د خوست د ولايتي شورا غړي وايي، هڅه کوي د قانون په تطبيق،دغوره حکومتوالۍ په پياوړتيا، د امنيت په ټينګښت او نورو برخو کې چې د دوی له وس پوره وي له ولايتي ادارې سره همکاري وکړي.
د خوست د ولايت مقام څخه د زمري په ١٣مه، پژواک خبري اژانس ته په يوه رالېږل شوې خبرپاڼه کې راغلي چې يادې څرګندونې له والي حکم خان حبيبي سره د ولايتي شورا په مياشتنۍ غونډه کې د دغې شورا غړو وکړې.
خبرپاڼه کې د شورا د غړو په حواله راغلي، هڅه کوي چې د ولايتي ادارې په همکارۍ ولسي ستونزې دنافذه قوانينو په رڼا کې هوارې کړي.
سرچينه زياتوي: ((د ولايتي شورا ټولو وکيلانو ژمنه وکړه، چې د ولايتي ادارې له ملکي او نظامي ارګانونو سره د امنيت په تامين،د سولې او ثبات په ټينګښت او د قانون په حاکميت کې اوږه په اوږه ګډ کار وکوي.))
په ياده خبرپاڼه کې راغلي، والي د شورا له غړو مننه وکړه چې له دوی سره د خوست په ابادۍ، سمسورتيا، امنيت او رغونه کې په ګډه همکارۍ ټينګار کوي.
هغه وويل: ((د ولايتي شورا غړي د ولس له منځه انتخاب شوي ولسي استازي دي او کولای شي په خپلو سيمو او ولسواليو کې د ولسي همکاريو په خپلولو سره د امنيت په تامين او د ناوړه دودونوپه له منځه وړلو کې اغېزمن رول ولوبوي.))
د سرچينې په حواله، والي حبيبي ولايتي شوراته ډاډ ورکړ چې ولايتي اداره به د دې شورا له ټولو غړو سره له هر راز توپيري چلند پرته ښې اړيکې وساتي او د اړتيا پرمهال به د ولسونو د استازو په توګه د هر غړي لازم لاسنيوی وکړي.
د خوست ولايت يو تن اوسېدونکي محمدزمان پژواک اژانس ته وويل، چې د ولايتي شورا غړي د خلکو په رايو ټاکل شوي دي او تر دولتي چارواکو دوی د خپلو سيمو پر ستونزو ښه پوهېږي.
محمد زمان زياته کړه، چې که ولايتي شورا په خپل وخت هره ستونزه له ولايتي اداره سره شريکه کړي، کولای شي د خلکو ستونزو او اړتياوو ته په ګډه مثبت ځواب ووايي.
نوموړي د ولايتي شورا له غړو غوښتنه وکړه، چې د خپلو خلکو د ښګڼې په خاطر تل له يو او بل سره همغږي واوسي او د ستونزو په هواري کې يو له بل سره مرسته وکړي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن