کابل (پژواک، ١٨ زمرى ٩٤): د ميدان وردګو ولايت اړوند د کابل- کندهار پر لويه لار د يوې ترافيکي پېښې له امله ١٩ تنه ټپيان شوي دي.
د ميدان وردګو د والي وياند عطاء الله خوږياڼي د زمري په ١٨مه پژواک خبري اژانس ته وويل چې دا پېښه تېر ماخوستن شاوخوا اته بجې رامنځته شوې ده.
هغه زياته کړه، له کندهاره د کابل پر لور روان د سپرليو يو ٣٠٣ موټر د سيداباد ولسوالۍ د ټوپ دښتې په سيمه کې له سړکه وتلى او چپه شوى دى.
د خوږياڼي په وينا، په دې پېښه کې د دوو مېرمنو په ګډون ١٩ تنه ټپيان شوي چې د امنيتي منسوبينو په همکارۍ د دغه ولايت مرکزي روغتون ته لېږدول شوي دي.
دى وايي چې د ټپيانو له ډلې د پنځو تنو روغتيايي حالت د اندېښنې وړ ښودل شوى دى.
د والي وياند د پېښې لامل د موټر چلوونکي بې احتياطي او ګړندى تګ په ګوته کړ.
د کابل- کندهار لويه لاره يوه له خونړيو لارو ګڼل کېږي چې ډېرى وخت پرې ترافيکي پېښې او جګړې رامنځته کېږي.
څو ورځې مخکې په همدې لويه لاره د غزني ښار اړوند سيمه کې د ٣٠٣ او يوه بل موټر د ټکر له امله ٩ کسان وژل شوي وو.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن