کندهار (پژواک ٣ وږى ٩٤): د کندهار والي وايي، هڅه کوي د کندهار په سيمه ييزه اداره کې د ديني عالمانو ونډه زياته کړه، ترڅو په ګډه کار وشي او د حکومت او ديني علمانو تر منځ واټن ختم شي.
والي ډاکټر همايون عزيزي دغه څرګندونې، نن په اونيزه امنيتي غونډه کې وکړې او زياته يې کړه، له ډېر پخوا څخه په حکومت کې د ديني عالمانو ونډه کمه ده او له همدې امله هغوى له حکومت څخه ليرې پاتې شوي دي.
هغه زياته کړه، هڅه کوي دغه لېريوالى له منځه يوسي او په حکومت کې د هغوى ونډه زياته کړي.
نوموړي ټينګار وکړ، چې د نورو تر څنګ دا د ديني عالمانو دنده او مسووليت دى، چې د خپل هېواد او خلکو لپاره کار وکړي.
دى وايي، د دې کار لپاره هڅه کوي چې د علماوو تر منځ د همغږۍ غونډې جوړې شي، څو له نظام سره يو ځاى د دښمنانو پر وړاندې ودرېږي.
عزيزي د کندهار د امنيتي وضعيت په اړه هم خبرې وکړې او امنيتي ځواکونو ته يې سپارښتنه وکړه، چې په ولسواليو کې دې امنيتي پوستې وارزوي او د امنيتي سرتېرو اړتياوې دې پوره کړي.
د ده په خبره، په دې توګه به امنيتي ځواکونه د دې جوګه شي چې مخالفين وځپي او د هغوى د خوځښتونو مخنيوى وکړي.
د ملي اردو د ٢٠٥ اتل قول اردو قومندان بريدجنرال دواد شاه وفادار په دې غونډه کې وويل، افغان ځواکونو تل له ګاونډيو هېوادونو سره ښې اړيکې غوښتي، خو که ګاونډيان افغان ځواکونو ته زيان رسوي، نو دوى به يې پر وړاندې درېږي.
د کندهار د امنيې قومندانۍ د امنيت امر مل پاسوال رحمت الله اطرافي د پوليسو د لاسته راوړنو په اړه معلومات ورکړل او ويې ويل، پوليسو د روانې اوونۍ په عملياتو او جګړو کې ١٦ وسله وال وژلي، ٧ يې ټپيان کړي او دوه تنه يې نيولي دي.
د ملي امنيت رياست مسوولينو وويل، په روانه اوونۍ کې يې ١٠ وسله وال وژلي او له هغوى څخه يې يوه اندازه وسلې تر لاسه کړې دي.
د عامه نظم د پوليسو د ارکانو رييس وويل، چې هغوى هم په بېلابېلو عملياتو کې ٧ وسله وال وژلي او ٦٥ بېلابېل ماينونه يې کشف او شنډ کړي دي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن