لښکرګاه (پژواک، ١٦ وږى ٩٤): چارواکي وايي چې په هلمند ولايت کې د ناټو ځواکونو په هوايي بمبار کې ١٧ افغان سرتېري وژل شوي دي.
د هلمند امنيه قوماندان پاسوال نبي جان ملاخېل د وږي په ١٦مه پژواک خبري اژانس ته وويل چې دغه بريد تېره شپه د هلمند په رېګ سيمه کې شوې ده، خو دا يې ونه ويل چې رېګ سيمه د کومې ولسوالۍ اړوند ده.
هغه زياته کړه چې د ناټو ځواکونو په هوايي بريد کې د نشه يي توکو پر وړاندې د مبارزې د ځانګړو ځواکونو يو شمېر سرتېري وژل شوي، خو کره شمېره يې ونه ښوده.
ملاخېل وويل چې سيمې ته يې د پلټنو لپاره يو پلاوى لېـږلى دى.
د هلمند د والي وياند عمر ځواک هم پژواک ته پېښه تاييد کړه او ويې ويل چې ځانګړي ځواکونه په رېګ سيمه کې د نشه يي توکو د قاچاقچيانو پر ضد پر علمياتو بوخت وو چې د بهرنيو ځواکونو تر هوايي بريد لاندې راغلل.
ده هم په دې بريد کې د يو شمېر سرتېرو د وژل کېدو پخلى وکړ، خو کره شمېره يې ونه ښوده.
بلخوا د هلمند ولايت د ګرمسېر ولسوالۍ يوې امنيتي سرچينې پژواک ته وويل چې د نشه يي توکو پر ضد د مبارزې ځانګړي ځواکونه په پنځو موټرو کې يادې سيمې ته تللي وو.
سرچينې زياته کړه چې په دغو عملياتو کې ٣٥ سرتېرو برخه ا خيستې وه چې ٣١ يې وژل شوي او څلور نور بهرنيو ځواکونو له ځانه سره وړي دي.
په کابل کې د امريکايي ځواکونو يوه وياند ډګروال براين ټرېبيوس پژواک ته وويل چې دوى تېره شپه خپلو ځواکونو ته د رامنځته شوي ګواښ د له منځه وړلو په موخه د کندهار په ميوند ولسوالۍ کې هوايي بريد کړى دى.
هغه زياته کړه چې د هلمند د هوايي بريد په اړه بايد د کورنيو چارو له وزارت څخه معلومات واخيستل شي.
د کورنيو چارو وزارت د نشه يي توکو پر وړاندې د مبارزې د معينيت وياند سيد مهدي کاظمي پژواک اژانس ته وويل چې دغه بريد تېره شپه د هلمند په ګرمسېر ولسوالۍ کې شوى و.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن