کابل (پژواک، ٢٥ وږى ٩٤): د ولسي جرګې ځينې وکيلان د ټاکنيز نظام د اصلاح طرحه نيمګړې او د نه منلو وړ بولي او د رڼو ټاکنو لپاره د برېښنايي تذکرو پر وېش ټينګار کوي.
د ټاکنيزو اصلاحاتو کمېسيون د ولسمشر فرمان پر بنسټ رامنځ ته شو او د روان کال د چنګاښ په ٣١مه يې کار پيل کړ، د هېواد له بېلابېلو پرګونو څخه د رايو له ترلاسه کولو څخه وروسته يې خپله لومړنۍ وړانديز شوې کڅوړه په ټاکنيز نظام کې د اصلاحاتو راوستلو په موخه حکومت ته وسپارله.
د وږي په ١٥مه، ولسمشر د يو فرمان له مخې د دې کمېسيون اووه وړانديزونه تاييد کړل او د دې وړانديزونو د ژر پلي کولو لپاره د قانوني لارو چارو برابرولو لارښوونه يې وکړه.
په دې وړانديزونو کې د رايوو ورکوونکو او رايو نوملړ، د ټاکنيزو کمېسيونونو ځواب وينه، د شکايتونو په کمېسيون کې د دوو بهرنيو وګړو شتون، په ولسي جرګه کې د هندوانو لپاره د يوې څوکۍ ځانګړي کول، د برېښنايي تذکرو وېش، په ولايتي او د ولسواليو په شوراګانو کې د ښځو څوکيو زياتول ٢٥سلنه او د اوسنيو رايو د کارتونو باطلول شامل دي.
د وړانديز شوې کڅوړې د درېيو مواردو په اړه (لومړى، دويم او اتم) تر اوسه ولسمشر فرمان نه دى صادر کړى، چې د ټاکنيز نظام بدلون، د ټاکنيزو حوزو کوچني کول او د روڼتيا کمېټې رامنځ ته کول دي.
دا په داسې حال کې ده، چې ځيني دا وړانديزونه د ټاکنو قانون تعديل ته اړتيا لري.
په ولسي جرګه کې د دايکنډي د خلکو استازي او د ټاکنيزو اصلاحاتو کمېسيون غړى چې د دې کمېسيون د کړنو په اړه يې د ولسي جرګې عمومي غونډې ته معلومات ورکول، وويل چې ولسمشر په ټاکنيز نظام کې د بدلون په اړه د وړانديز شوو مواردو، د ټاکنيزو کمېسيونونو د ځواب وينې او د رايو ورکوونکو د نوملړ برابرولو لپاره د روڼتيا کمېټې جوړولو په اړه نور معلومات غوښتي او پاتې نور يې د فرمان له مخې د اجرا په مرحله کې تر لاس لاندې نيولي دي.
د هغه په وينا، د ټاکنو اوسنى نظام يو ناسم سيستم دى، چې يواځې څلور هېوادونه ترې استفاده کوي.
نوموړي په ټاکنوکې د شفافيت په موخه د رايوو ورکوونکو د نوملړ په برابرولو ټينګار وکړ او ويې ويل، د رايو ورکوونکو د نوملړ چمتو کول په ټاکنو کې د روڼتيا بنسټ جوړوي.
خو د خلکو ډېرو استازو پر دې طرحې نيوکه وکړه.
په دې جرګه کې د بدخشان خلکو استازي امان الله پيمان وويل: "د اصلاحاتو کمېسيون طرحې نيمګړې او د قانون خلاف دي او بايد دوديزه لويه جرګه جوړه شي او په دې اړه تصميم ونيسي."
په ولسي جرګه کې د هرات خلکو استازي منورشاه بهادري او کمال ناصر اصولي هم دا طرحه نيمګړې وبلله او ويې ويل، چې دا طرحه د منلو وړ نه ده.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن