لښکرګاه (پژواک، ٢٤ لړم ٩٤): د هلمند ولايت په مرکز لښکرګاه کې د بهرنيو ځواکونو پر موټر ځانمرګى بريد شوى، چې له امله يې يو ملکى وګړى وژل شوى او ١٢ نور ټپيان دي.
د هلمند د والي وياند عمر ځواک، پژواک خبري اژانس ته وويل، نن مازيګر په شاوخوا څلورنيمو بجو د لښکرګاه په لومړۍ ناحيه کې د ملي امنيت رياست ودانۍ سره نږدې، د بهرنيو ځواکونو درې موټر روان وو، چې پر يوه يې د موټربم په وسيله ځانمرګى بريد شوى دى.
ده زياته کړه، په دې پېښه کې يو ملکي وګړى وژل شوى، يو پوليس او ١١ عام وګړي ژوبل شوي دي.
د هغه په وينا، د چاودنې له امله د بهرنيانو يو موټر ويجاړ شوى، خو ځاني زيان ورته نه دى رسېدلى.
د لښکرګاه د ايمرجنسي روغتون يوې سرچينې پژواک ته وويل، دوى ته له يادې پېښې څخه يو مړى او ١٢ ټپيان ور وړل شوي دي.
د دې بريد مسووليت تراوسه پورې چا په غاړه نه دى اخيستى.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن