سرجنګ: د جګړې ځواب باید په جګړه وویل شي

لښکرګاه (پژواک، ۴ ليندۍ ۹۴): د هلمند نوى امنيه قوماندان وايي چې اوسمهال په هېواد کې سولې ته اړتيا نشته، د جګړې ځواب بايد پر جکړه ورکړل شي.

دغه څرګندونې د هلمند ولايت لپاره نوي ټاکل شوي امنيه قوماندان مل پاسوال عبدالرحمن سرجنګ وکړې.

هغه وويل: ((په دې وخت کې نه  سولې ته  اړتیا شته  او نه هم امکان لري، زه اوس له سولې په جنګ خوښ یم، د جنګ ځواب  به په جنګ ووایو.))

ده وويل چې يواځې خبرې نه شي کولاى امنيتي ستونزې هوارې کړي، د امنيت د ټينګښت لپاره بايد عملي ګامونه پورته شي.

سرجنګ وايي چې په هلمند کې د امنيت د  ټينګښت لپاره به د جګړې هرې لومړۍ کرښې ته ځان رسوي.

د سرجنګ په ګډون د ٥٠٥ زون قوماندان پاسوال عصمت الله دولتزى او د عامه نظم د  اتمې لوا قوماندان په توګه سمونوال خليل جواد نن (د ليندۍ ٤مه) د کورنيو چارو وزارت د اداري مرستيال لوی پاسوال اکرام الدین  یاور له خوا د هلمند خلکو ته ور پېژندل شول.

ياور وويل چې تر دې وړاندې امنيتي چارواکو په ښه توګه خپلې دندې په دغه ولايت کې سرته رسولې خو د ځينو اړتياوو له مخې دغه بدلونونه راغلي دي.

ده وويل چې په دې وروستيو کې د هلمند په ګډون د هېواد په ډېرو سيمو کې امنيتي ستونزې زياتې شوې دي.

په دې غونډه کې د هلمند پخواني امنيه قوماندان پاسوال نبي جان ملاخېل وويل چې په تېر يو کال کې د هلمند په بېلابېلو سيمو کې د طالبانو پر وړاندې په جګړه کې برخه اخيستې ده.

هغه زياته کړه: ((ما لږ وخت د کار په دفتر کې او ډېر وخت مې د جګړو په کرښو کې تېر کړى دى.))

د کورنيو چارو وزارت د معلوماتو له مخې، نبي جان ملاخېل د کندهار د پولیسو د ۴۰۴ زون د قوماندان په توګه ګومارل شوى دى.

دغه راز په دې غونډه کې د ٥٠٥ زون قوماندان پاسوال عصمت الله دولتزي وويل چې په هلمند کې د امنيت د ټينګښت لپاره به جدي کار کوي او قانون به پلى کوي.

login or register a new account.