کابل (پژواک، ٩ ليندۍ ٩٤): کابل کې د اسيا زړه هېوادونو د کوچنيو او منځنيو تشبثاتو د پراختيا په موخه ناسته جوړه شوه او پايلې به يې په اسلام اباد کې د "استانبول پروسې" جوړېدونکې ناستې ته وړاندې شي.
ټاکل شوې د روانې ليندۍ مياشتې په ١٨مه د پاکستان په پلازمېنه اسلام اباد کې د اسيا زړه هېوادونو د چارواکو او بهرنيو چارو وزيرانو د استانبول پروسې غونډه جوړه شي.
د استانبول پروسې لومړۍ غونډه په ٢٠١١ کال کې په ترکيه کې جوړه شوه او تر هغه وروسته په بېلابېلو هېوادونو کې دغه ناستې جوړې شوې دي.
له ترهګرۍ سره د مبارزې په ګډون سيمه ييزى همکارۍ، د نشه يي توکو د توليد او قاچاق مخنيوى، د سيمه ييزى سوداګرۍ پياوړتيا، په افغانستان کې د سولې ټينګښت او له فقر سره مبارزه د دې پروسې مهمې موخې دي.
د کابل په نننۍ ناسته کې د بهرنيو چارو وزارت سياسي مرستيال حکمت خليل کرزي وويل: "د دغه سيمينار موخه دا ده تر څو وکولای شو د افغانستان او سيمې هېوادونو تر منځ د کوچينو او منځينو تشبثاتو د وضعيت، په دې برخه کې د شته ستونزو او فرصتونو، د همکاريو پر څرنګوالي، د يادو تشبثاتو د پراختيا او اړيکو د پياوړتيا لارې چارې ولټوو او په دې برخه کې شته تجربې سره شريکې کړو."
خليل کرزي زياته کړه، د دې ناستې پايلې به اسلام اباد کې د استانبول پروسې د بهرنيو چارو وزيرانو ناستې ته وړاندې شي تر څو په دې برخه کې عملي حل لارې ولټول شي.
هغه وويل: "کوچني او منځني تشبثات د مخ پر ودې هېوادونو په اقتصادي پياوړتيا کې ۹۰ سلنه برخه لري، نو اړينه ده چې په دې برخه کې سيمه ييزه همکاري رامنځته شي."
ده د نورو جزئياتو له ورکولو پرته وويل چې په دې ناسته کې د هېواد اقتصادي کارپوهانو تر څنګ د استانبول پروسې د ځينو غړو هېوادونو او د دې پروسې ملاتړ کوونکو هېوادونو او سازمانونو استازو ګډون درلود.
افغانستان، اذربايجان، ايران، د عربو متحده امارات، پاکستان، تاجکستان، ترکمنستان، ترکيه، چين، روسيه، سعودي عربستان، قزاقستان، قرغزستان او هند د اسيا زړه هېوادونو يا استانبول د پروسې غړي هېوادونه دي.
همدا راز د امريکا متحده ايالتونو، انګلستان، المان او فرانسې په ګډون ۱۷ هېوادونه او د ملګرو ملتونو سازمان په ګډون ۱۲ نړيوال سازمانونه د استانبول د پروسې ملاتړي دي.
په نننۍ ناسته کې د قزاقستان په استازيتوب رجب رُسو خبرې وکړې او ويې ويل اړينه ده چې د کوچنيو او منځنيو تشبثاتو د پراختيا لپاره د سيمې هېوادونو تر منځ د باور فضا رامنځته شي.
هغه وويل: "موږ بايد د سيمې په کچه د کوچنيو او منځنيو تشبثاتو پر فرصتونو او ستونزو بحث وکړو او هغه فرصتونه ولټوو چې له مخې يې وکړی شو په افغانستان او سيمه کې د يادو تشبثاتو د پراختيا لپاره متقابله همکاري او ملاتړ رامنځته شي."
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن