چاودنې څلورو کسانو ته مرګ ژوبله واړوله

کلات (پژواک، د سلواغې لومړۍ نېـټه ٩٤): د زابل په شاه جوى ولسوالۍ کې د يوې چاودنې له امله ملي اردو او ملکي وګړو ته مرګ ژوبله اوښتې ده.

د شاه جوى ولسوال وزيرمحمد جوادي د سلواغې په لومړۍ نېـټه پژواک خبري اژانس ته وويل، دا چاودنه نن له غرمې مخکې يوولس بجې شوې ده.

هغه زياته کړه چې د ملي اردو سرتېرو د ولسوالۍ بازار ته څېرمه د چارسو په سيمه کې يو کشف شوى ماين شنډاوو چې پرې چاودېدلى دى.

د ولسوال په وينا، په دې چاودنه کې يو ملکي وګړى او يو سرتېرى وژل شوي، يو سرتېرى او يو ملکى وګړى ټپي شوي دي.

سرچينه وايي چې ټپيان روغتون ته لېږدول شوي خو روغتيايي حالت يې د ډاډ وړ ښودل شوى.

وسله والو تر اوسه په دې اړه څه نه دي ويلي. 

login or register a new account.