کابل (پژواک، ٢٤ سلواغه ٩٤): ولسمشر اشرف غني وايي چې دوى لا پخوا د داعش د ګواښونو په اړه نړۍ ته خبردارى ورکړى او په افغانستان کې يې دغې ډلې ته ماتې ورکړې ده.
ولسمشر اشرف غني دغه څرګندونې پرون د جرمني په مونيخ ښار کې نړيوال امنيتي کنفرانس ته په خپله وينا کې کړې دي.
هغه زياته کړه چې نړيوالو د داعش وسله والو ډلې د ګواښونو په اړه د دوى خبرداري ته پام ونه کړ او فکر يې کاوو چې افغانستان د نړيوالو پام راجلبولو په موخه دا خبردارى ورکړى دى.
ولسمشر اشرف غني هيله څرګنده کړه چې نړيوالو به اوس د دوى د يو کال پخوا خبردارى او د داعش په اړه يې اندېښنې درک کړې وي.
نوموړي په ياده غونډه کې يو ځل بيا په ډاګه کړه چې افغانستان ته د سيمې له نورو هېوادونو روسيې، چين او د منځنۍ اسيا له يو شمېر هېوادونو ترهګر او ورانکاري استول کېـږي.
هغه وويل چې القاعده له منځه نه ده تللې، بلکې دغې ډلې بېرته ځان منظم کړى اوس بايد د داعش تر څنګ د القاعدې نوي ګواښ ته هم رسېده ګي وشي.
ولسمشر غني وايي، پاکستاني طالبان، د حقانې شبکه او نورې ډلې ګډ ګواښ پېښوي او جرمي اقتصاد د دغو ډلو لپاره د فعاليت زمينه برابره کړې ده.
د نوموړي په وينا، د انسانانو او نشه يي توکو په قاچاق کې هم دغه ډلې لاس لري.
اشرف غني د نړۍ د هېوادونو، بنسټونو او ټولنو څخه غوښتنه وکړه چې له تشدد سره د مبارزې لپاره دې د افغانستان ملاتړ او مرسته وکړي.
د جرمني په مونيخ ښار کې جوړ شوي دغه امنيتي کنفرانس کې د امنيت په اړه خبرې کېږي.
په دې غونډه کې د نړۍ د بېلابېلو هېوادونو ولسمشران، لوړپوړي چارواکي او سياسي مشرانو برخه اخيستې ده.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن