خوست ښار (پژواک، ١٧ ورى٩٥): په خوست ولايت کې د ١٨ لوبـډلو په ګډون د کرکټ شل اووريزې سيالۍ پيل شوې.
لوبغاړي وايي چې له کابل او ننګرهار وروسته خوست ولايت د کرکټ په ډګر کې ډېر پرمختګ کړی او زيات مينه وال لري، خو مسوولين په خپلو چارو کې ناغېړي کوي.
دوی دا څرګندونې د کرکټ د يو لړ سياليو د پيل پر مهال چې په دغه ولايت کې د چنار خصوصي راډيو له لوري تنظيم شوې، له پژواک اژانس سره د خبرو په ترڅ کې وکړې.
د چنار راډيو مشر محمدغفور مهدي پژواک اژانس ته وويل چې په دې سياليو کې د خوست په کچه ۱۸ لوبډلو ګډون کړی او دوې اوونۍ دوام کوي چې موخه يې د ځوانانو يووالی او پرمختګ دی.
د کرکټ يو لوبغاړي عبدالرحمن پژواک ته وويل چې د کرکټ بورډ ځايي اداره نه هم د سياليو په تنظيم کې کوم د پام وړ رول لوبولی او نه يې هم د کرکټ د لوازمو په برابرولو کې له لوبغاړو مرسته کړې ده.
هغه زياته کړه: ((د کرکټ يو بېټ له شپږو سوو افغانيو څخه نيولې تر څو زرو پورې بيه لري. دا د يو غريب لوبغاړي له وس پورته خبره ده. لباس هم دومره قيمت لري چې غريب لوبغاړي نه شي اخيستی.))
نوموړي دغه راز وويل چې د لوبغاړو د ښې او مسلکي روزنې لپاره پر اړينو وسايلو سمبالې اکاډمۍ ته هم اړتيا لري، په داسې حال کې چې يواځې په مرکز کې د کرکټ يوه اکاډمي لري چې دا هم ډېرې نيمګړتياوې لري.
د افغانستان د کرکټ د ۱۹ کلنو لوبډلې يوه لوبغاړي نويد عبيد پژواک ژانس ته وويل چې د اړتيا وړ اسانتياوو په برابرولو سره د سياليو ترسره کول، د کورني کرکټ په پياوړتيا او پرمختګ کې ډېر اغېزناک تمامېږي.
نوموړي په کابل کې د کرکټ بورډ له عمومي ادارې غوښتنه وکړه، چې د کورني کرکټ د پياوړتيا او پرمختيا لپاره په ولايتونو کې لوبغاړو ته د اسانتياوو په برابرولو کې مهم ګامونه واخلي.
هغه زياته کړه: ((د هندوستان کرکټ چې په کوم مقام کې دی، د خپل کورني کرکټ له برکته تر دې ځايه رسېدلی. که زموږ د بورډ اداره هم دې ټکې ته پام زيات کړي، نو ډېرې لاسته راوړنې به ولرو.))
په خوست کې د کرکټ بورډ مسوول سيدعالم شاه له پژواک اژانس سره په خبرو کې د لوبغاړو يادې ستونزې ومنلې او ويې ويل چې په دې اړه د بورډ له مرکزي مسوولينو سره خبرې کړې دي.
نوموړي وويل: ((مرکزي ادارې ژمنه کړې چې د بوديجې او ډونر په ميندلو سره به د کرکټ لوبغاړو ته د کرکټ ټول اړين وسايل او لوازم برابر او دوی ته به يې په واک کې ورکړي.))
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن