د ګردېز نوي ښاروال کار پیل کړ

ګردېز (پژواک، ١٤غويی ٩٥): د پکتيا نوى ښاروال وايي چې د ښار پاکول، د عوايدو لوړوالى او د ښو ښاري خدمتونو وړاندې کول يې له کاري لومړيتوبونو څخه دي.

د ولسمشر اشرف غني د فرمان له مخې څو ورځې وړاندې عصمت الله خالد د پکتيا د نوي ښاروال په توګه وټاکل شو.

عصمت الله خالد نن (د غويي ١٤مه) په مرکز ګردېز کې خپله دنده پيل کړه.

هغه د د معرفۍ په غونډه کې وويل چې په ګردېز ښار کې يې د خدمتونو د وړاندې کولو لپاره منظمه برنامه جوړه کړې ده.

هغه وويل: ((د عوايدو د لوړوالي او د ښار د پاکوالي لپاره هم ښې برنامې لرم چې عملي کول يې وخت ته اړتيا لري.))

خالد وايي چې د يادو پلانونو په عملي کولو کې بايد د ښار اوسېدونکي ورسره پوره همکاري وکړي.

ده وويل چې په ګردېز ښار کې اوس مهال يواځې شل سلنه هټيو د فعاليت کولو جواز ترلاسه کړی خو د عوايدو د لوړوالي په موخه به  تر دې وروسته ټولو هټيو ته د کار کولو جواز ورکړل شي.

په دې غونډه کې د پکتيا د ولايتي شورا غړي تاج محمد منګل وويل چې په تېرو کلونو کې ګردېز ښار ته اړينه پاملرنه نه ده شوې.

هغه وايي چې د دغه ښار ډېرى سړکونه خراب دي او نورو ښاري خدمتونو سيستمونه يې هم ويجاړ شوي دي.

د منګل په وينا، که ښاروالۍ ښه خدمات وړاندي کړي نو ټول پکتياوال به ورسره په هره برخه کې پوره همکارۍ وکړي.

د يادونې ده، عصمت الله خالد تر دې وړاندې د لوګر د ښاروال په توګه دنده ترسره کوله.

login or register a new account.