کابل (پژواک، ٢٣ غويى ٩٥): په کابل ښار کې د تېرې پنجشنبې په پرتله د بورې او اوړو بيې لوړې شوې دي.
د کابل ښار خوراکي توکو د سوداګرو ټولنې مشر فضل الرحمن پژواک خبري اژانس ته وويل چې نن د تېرې پنجشنبې په پرتله، د ٤٩ کيلوګرامه پاکستانۍ بورې بيه له ٢١٥٠ افغانيو ٢٢٥٠ افغانيو او د لومړۍ درجه ٤٩ کيلوګرامه قزاقستاني اوړو عمده پلور بيه له ١٢٣٠ افغانۍ، ١٢٥٠ افغانيو ته لوړه شوې ده.
د هغه په خبره، د بورې بيه په نړيوالو بازارونو کې لوړه شوې، خو د اوړو بيه د کابل په بازارونو کې د وارداتو د کمښت به سبب لوړ شوې ده.
خو نوموړي وويل چې نن هم د تېرو اوو ورځو په څېر د ٢٥ کيلوګرامه اول سېله پاکستانۍ وريجو عمده پلور بيه ١٦٠٠ افغانۍ او د ١٦ لېتره ښايسته غوړيو عمده پلور بيه ١٠٥٠ افغانۍ ده.
په ورته وخت کې د کابل ښار د منډوي يوه چاى پلورونکي رحمت وويل چې نن هم د تېرو اوو ورځو په څېر د يو کيلو تور افريقايي چاى عمده پلور بيه ٢٦٠ افغانۍ او د يو کيلو شين مدينه چاى بيه ٢٤٠ افغانۍ ده.
د يو شمېر لومړنيو خوراکي توکو پرچون پلور بيې له عمده پلور بيو سره په ځينو مواردو کې ډېر او په ځينو مواردو کې کم توپير لري.
د کابل ښار د تايمني سيمې د خوراکي توکو يو پلورونکى احمد نويل وايي چې نن د ٤٩ کيلوګرامه پاکستانۍ بورې پرچون پلور بيه ٢٣٠٠ افغانۍ، د پنځوس کيلوګرامه لومړۍ درجه قزاقستاني اوړو پرچون پلور بيه ١٤٥٠ افغانۍ، د ٢٤ کيلوګرامه لومړۍ درجه پاکستانۍ سېله وريجو بيه ١٩٠٠ افغانۍ، د ١٦ لېتره ښايسته اوبلنو غوړيو بيه ١١٠٠ افغانۍ، يو کيلو تور افريقايي چاى بيه ٢٧٠ افغانۍ او د يو کيلو شين مدينه چاى بيه٢٦٠ افغانۍ ده.
د سون توکو او اوبلن ګاز بيو کې هم څه بدلون نه دى راغلى
د کابل ښار د وزير اباد د تېلو ټانک يوه کارکوونکي عبدالهادي وويل چې نن د تېرې پنجشنبې په پرتله د يو لېتر ډېزلو بيه د تېرې اوونۍ په څېر ٣٢ افغانۍ اود يو لېتر پټرولو بيه ٣٩ افغانۍ ده.
د کابل ښار د کلوله پشتې يوه ګاز پلورنکي محمد شريف وويل چې نن هم د تېرې پنجشنبې په څېر د يو کيلو ګاز بيه ٤٥ افغانۍ ده.
د سرو زرو بيو کې هم څه بدلون نه دى راغلى.
د کابل ښار په تيمورشاهي واټ کې د حاجي حامد صالحزاده زرګرۍ مالک محمد فواد وويل چې نن د تېرې پنجشنبې په څېر د يوه ګرام عربي ٧٩٠ عيار سرو زرو بيه ٢٣٠٠ افغانۍ ٢٣٠٠، د يوه ګرام ٥٨٥ عيار روسي سرو زرو بيه ١٩٠٠ افغانۍ ده.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن