هرات (پژواک، ١٥ غبرګولى ٩٥): د هرات ولايت سوداګرو او صنعتګرانو ولسمشر ته د برېښنا د لګښت او مالياتو پر زياتوالي شکايت وکړ.
له ارګه پژواک خبري اژانس ته په يوه رالېږل شوې خبرپاڼه کې راغلي چې ولسمشر اشرف غني پرون ماښام د هرات د خصوصي سکتور او ملي سوداګرو له استازو سره وکتل.
سرچينې زياته کړې، د دې کتنې پر مهال د هرات د سوداګرۍ خونو ريیس سعد خطیبي، د صنعتګرانو د اتحادیې ريیس حمیدالله خادم او د ښاروالۍ د مشورتي شورا ريیس د نورو په استازیتوب خبرې وکړې.
هغوی انکشافي پروګرامونو او لویو اقتصادي پروژو ته د ولسمشر د پاملرنې قدرداني وکړه.
د خصوصي سکتور او ملي سوداګرو استازو ولسمشر ته د برېښنا د لګښت د بیې د زیاتوالي، د مالیاتو د زیاتوالي، په ګمرکونو کې د څارونکي د ټاکلو، د صنعت د ملاتړ په نوم د اونۍ نومولو، د ګمرکي قوانینو د یو برابر او سراسري تطبیق، د ځمکو د غصب د مخنیوي، د ښاري دروازو د کنټرول او د هرات چشت شریف د سړک جوړولو د کار د بشپړولو او نورو موضوعاتو په هکله خپل نظریات او وړاندیزونه شریک کړل.
ولسمشر اشرف غني د هغوى د خبرو تر اورېدلو وروسته وویل، حکومت له خصوصي سکتور او پانګوالو څخه هر اړخیز ملاتړ کوي او هغوی چې کومې اقتصادي طرحې برابروي، د اقتصادي عالي شورا په ناسته کې به پر دې او د بيو پر ستونزې بحث وشي.
هغه د هرات صنعتي ښارګوټي کې د زېربنایي ستونزو په هکله وویل، اړتیا ده چې په دې هکله هر اړخیزه ارزونه وشي تر څو د هغو پر اساس تصمیم ونیول شي.
ولسمشر د اصلاحاتو راوستو په هکله وویل، په نږدې راتلونکي کې به د استخدام پروسه مخصوصاً په ګمرکونو کې و ارزول شي، تر څو مشخصه شي چې څوک په واسطه ګومارل شوي دي.
اشرف غني ټینګار وکړ، د هېواد په عمده ښارونو کې د ښاروالۍ د څلورو ادارو لپاره چې زیات عواید یې لرل، ځانګړې بوديجه برابرېږي چې هرات ولایت به هم د هغه جز وي.
هغه وويل، د ځمکې د غصب مخنیوی او د غصب شوو ځمکو راګرځول د والیانو، امنیه قوماندانانو او د قول اردوګانو د قوماندانونو له عمده دندو څخه دي او په دې برخه کې باید جدي ګامونه واخیستل شي.
بلخوا ولسمشر د هرات د ښځو او ځوانانو له استازو سره د ليدنې پر مهال ويلي چې سلمان بند به د اقتصادي تحرک زمينه برابره کړي.
هغه زياته کړه چې حکومت له اداري فساد سره د مبارزې په کار کې د تعقيب د مصئونيت فرهنګ د پاى ته رسولو لپاره عملي اقدامات ترسره کړي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن