پل علم (پژواک، ۲۸ چنګاښ ۹۵): د لوګر د پوهنې رياست وايي چې د نهو ښوونځيو د احاطې دېوالونو د جوړونې چارې بشپړې او ګټې اخيستنې ته وسپارل شوې.
د لوګر د پوهنې رياست ویاند محمد شاپور عرب د چنګاښ په ٢٨مه پژواک خبري اژانس ته وويل چې د خواجه انګور، خواجه بلند، خروټي، ملاکۍ، پسپیچک، میرک، پنګرام، نو شهر او کرمابه د ښوونځو لپاره د احاطوي دېوالونو د جوړونې چارې بشپړې شوې.
عرب وایي: ((دغو ښوونځیو تر دې وړاندې احاطې نه درلودې او د زده کړو پر مهال یې زده کوونکي او ښوونکي خوندي نه وو چې په دې سره به یاد ښوونځي د امنیت له پلوه تر ډېره بریده خوندي شي.))
د هغه په وينا، پر دې پروژو ۱۷ میليونه افغانۍ لګښت راغلى چې د نړيوال بانک له لوري ورکول شوی او چارې یې د پوهنې رياست له لوري ترسره شوې دي.
د نوموړي د معلوماتو له مخې، چې همدا اوس مهال د شپږو نورو ښوونځیو د احاطې دېوالونو د جوړونې چارې روانې دي او په پلان کې ده چې سږ کال د ٤٠ نورو ښوونځيو د احاطې دېوالونه هم جوړ شي.
د پنګرام د منځني ښوونځي استاد سید باقر پژواک ته وویل: ((موږ د خپل ښوونځي د احاطې پر جوړېدو ډېر خوښ یو.))
د هغه په وينا، تر دې وړاندې دغه ښوونځي د احاطې دېوال نه درلود چې د امنيتي ستونزو تر څنګ ډېرى وخت به زده کوونکي په پټه له ښوونځي تښتېدل.
هغه هيله وښوده چې د دغه دېوال په جوړېدو سره به تر يو بريده يادې ستونزې کمې شي.
د یادونې ده، اوس مهال د لوګر له څه باندې درې سوه ښوونځيو له ډلې اتيا يې د احاطې دېوالونه لري او اتيا نور ودانۍ نه لري.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن