کابل(پژواک، ٣ زمرى ٩٥): د کورنيو چارو وزارت او دکابل ګارنيزيون قوماندانۍ اعلان کړى چې سر له نن ورځې څخه تر لسو ورځو پورې هېڅوک او هېڅ کومه ډله د غونډو او لاريونونو د جوړولو اجازه نه لري.
دا په داسې حال کې ده چې تېره ورځ د کابل ښار دهمزنګ سيمه کې د جنبش روشنايي په نوم لاريون کې د دوو ځانمرګو بريدونو له امله ٨٠ کسان ووژل شول او ٢٣١ ټپيان شول.
ددې بريد مسووليت داعش ډلې پر غاړه اخيستى او په همدې مناسبت نن په هېواد کې ملي ماتم اعلان شوى دى.
د کابل ګارنيزيون او کورنيو چارو وزارت په ابلاغيه کې له هېوادوالو غوښتنه شوې چې د خپلو هېوادوالو او عامه نظم د ساتنې لپاره له دولت سره همکاري وکړي.
سرچينه زياتوي:((د افغان دولت مشرتابه د قانون پر وړاندې د يوه مسوول او د خپلو وګړو حقونو ساتنې د يوه ژمن دولت په توګه د پېښې ټپيانو ته د روغتيا او شهيدانو لوړ مقام ته د درناوي ترڅنګ هېوادوال خبروي چې د غونډو، لاريونونو او اعتصابونو قانون د پنځمې، شپږمې او ١٤مې مادې موادو، همدرانګه د پوليسو قانون د پنځمې او لسمې مادې د موادو او د مدني او سياسي حقونو د نړيوال تړون د ٢٢ مې مادې د موادو له مخې، ددې ابلاغيې له اعلان څخه تر لسو ورځو پورې د غونډو او لاريونونو جوړول منع شوي دي.))
سرچينه ليکي چې افغان دولت د اساسي قانون، د نړيوالو قوانينو او د هېواد د نافذه قوانينو په رڼا کې د افغانستان د خلکو له حقونو او ازاديو ملاتړ کوي او ځان ددې ازاديو په ساتنه کې مکلف بولي.
ابلاغيه زياتوي چې افغان دولت د خلکو د امنيت او خونيدتوب لپاره چمتو والى لري، د تېرې ورځې په لاريون کې يې هم د لاريون کوونکو د خونديتوب لپاره له خپلو ټولو امکاناتو کار اخيستى، خو ( د افغانستان د خلکو دښمنانو) له کوچنيو تشو او حساسو موقعيتونو کار اخيستى، (ترهګريز او جنايت کارانه) اعمال يې ترسره کړل چې غميزه يې رامنځته کړه او يو شمېر هېوادوالو ته يې مرګ ژوبله واړوله.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن