کندهار (پژواک، ١٧ زمرى ٩٥): د کندهار والي پر بهرنيو اسعارو د راکړې ورکړې د مخنيوي په موخه يوه کمېټه وټاکله او هغوى ته يې دنده وسپارله چې که څوک له افغانۍ پرته د نورو اسعارو پر راکړه ورکړه ونيول شي، پر کاروبار دې يې بنديز ولګول شي.
دغه پرېکړه په هغې غونډه کې وشوه چې نن (د زمري ١٧مه) د کندهار ولايت په مقام کې د والي ډاکټر همايون عزيزي په مشرۍ جوړه شوې وه.
په دې غونډه کې د کندهار امنيه قوماندان جنرال عبدالرازق، د سوداګرۍ خونې رييس حاجي نصرالله زهير، د اقتصاد رييس محمد رحيم رحيمي، د افغانستان بانګ رييس محمد نعيم اکبري او د صرافانو د ټولنې مشر حاجي قندي اغا او يو شمېر نورو صرافانو ګډون کړى وو.
د کندهار والي ډاکټر همايون عزيزي وويل، افغانۍ د افغانانو د ملي هويت څرګندويه ده او بايد په ټولو ورځنيو چارو او راکړه ورکړه کې يوازې افغانۍ وکارول شي.
هغه زياته کړه، د افغانۍ په بشپړ رايج کېدو به ملي هويت ساتل شوى وي، د هېواد اقتصادي وضعيت به وده وکړي او د قاچاق کوونکو ناروا کاروبار به له خنډ سره مخ شي.
د سوېلي زون په ولايتونو کې تر ډېره حده نه يوازې عامه راکړه ورکړه په بهرنيو اسعارو په ځانګړې توګه په کلدارو کېده، بلکې د مخدره توکو کار و بار هم په پاکستانيو کلدارو کېږي.
د عزيزي په خبره، که په ورځني کاروبار او راکړه ورکړه کې يوازې افغانۍ وکارول شي نو په دې توګه قاچاق کوونکو ته درانه زيانونه اوښتلاى شي.
خو والي د افغانستان بانک له مسوولينو وغوښتل چې هره ورځ دې د صرافانو لپاره د بهرنيو اسعارو پر وړاندې افغانيو ته عادلانه بيه وټاکي، چې په دې توګه دوى هم له زيان څخه خوندي و اوسي او هم خلکو ته ګټه ورسېږي.
نوموړي په دې غونډه کې له اړوندو ادارو يوه کمېټه په کار وګومارله چې په بهرنيو اسعارو د راکړې ورکړې مخنيوى وکړي او که څوک سرغړونه کوي نو د امنيې قومندانۍ د جنايي امريت له خوا يې بايد کار و بار وتړل شي.
د کندهار امنيه قوماندان مل پاسوال عبدالرازق بيا په د افغانيو په کارولو کې د خلکو رول مهم ياد کړ او هغوى ته يې خبردارى ورکړ چې نور دې د بهرنيو اسعارو له کارولو لاس واخلي.
نوموړي هم وويل چې يو شمېر غير مسلکي صرافانو د افغانيو ارزښت ته زيان رسولى چې د افغانستان بانک کولاى شي هره ورځ افغانيو ته د بيې په ټاکلو د دغې ستونزې مخنيوى وکړي.
د کندهار د صرافانو د ټولنې مشر حاجي قندي اغا وويل، دا ډېر ښه فرصت دى چې حکومت لاس په کار شي او په ټولو ولايتونو کې په بهرنيو اسعارو د راکړې ورکړې مخنيوى وکړي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن