هرات (پژواک ٤ وږى ٩٥): په ولسي جرګه کې د بادغيس يو استازى په هرات ولايت کې د وسله وال بريد په ترڅ کې ټپي شوى دى.
د هرات والي وياند جيلاني فرهاد پژواک خبري اژانس ته وويل، په ولسي جرګه کې د بادغيس ولايت استازى سيد محمدموسى جناب، نن د هرات په شالبان سيمه کې د وسله وال بريد موخه ګرځېدلى دى.
هغه وايي: "جناب صاحب نن له غرمې وړاندې ١٠:٣٠ بجې، کله چې د هرات ښار په شالبافان سيمه کې په خريدارۍ بوخت و، د يوه موټرسايکل سپاره کس له لوري پرې ډزې وشوې او نوموړى په کې ټپي شوى دى."
فرهاد زياته کړه، د ولسي جرګې ياد غړى د امنيتي ځواکونو له لوري د هرات حوزوي روغتون ته لېږدول شوى او روغتيايي حالت يې د ډاډ وړ دى.
د فرهاد په وينا، بريد کوونکى له بريد وروسته تښتېدلى او پوليسو يې د نيولو هڅې پيل کړې دي.
د هرات حوزوي روغتون وياند محمدرفيق شېرزى هم وايي، چې د ولسي ياد غړى په خېټه کې ټپي شوى دى.
د شېرزي په وينا، جناب اوسمهال په روغتون کې بستر او روغتيايي حالت يې د ډاډ وړ دى.
دا په داسې حال کې ده، چې نن سهار په بلخ کې د ولسي جرګې يو بل غړى هم د ماين له چاودنې روغ وتلى، خو د ياد بريد په پايله کې بيا درې کسان وژل شوي او ١٢ نور ټپيان شوي دي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن