کابل ښار (پژواک، ٢٠ وږى ٩٥): د ولسي جرګې يو شمېر وکيلانو د ولسمشر له لوري د درېيم تقنيني فرمان صادرول د قانون خلاف بولي او د ټاکنيزو حوزو کوچني کېدل د ستونزې رامنځ ته کول ګڼي؛ خو ځينې نورو بيا دا اقدام غوره وباله.
د افغانستان دولت کابينې، د ټاکنو قانون اصلاح شوې طرحه د روان کال د وږي په لومړۍ نېټه تاييد کړه چې د يادې طرحې پر بنسټ، د ولسي جرګې ټاکنو لپاره د يوې څوکۍ سيستم په پام کې نيول شوى دى.
د قانون له مخې، دا مهال د ولسي جرګې په ټاکنو کې هر ولايت يوه ټاکنيزه حوزه ده؛ خو د يوې څوکۍ سيستم له مخې، د هر ولايت د نفوسو له مخې په څو ټاکنيزو حوزو وېشل کېږي، چې د هرې حوزې خلک د خپلې حوزې اړوند نوماند ته رايه ورکوي.
ولسمشر غني تر دې وړاندې ټاکنيز نظام کې د اصلاحاتو په موخه دوه فرمانونه صادر کړل؛ خو ملي شورا تاييد نه کړل، دويم فرمان وروسته له هغه ولسي جرګې ته واستول شو، چې د ملي شورا ګډ پلاوي په دې برخه کې د ملي شورا دواړو مجلسونو اختلاف لرې نه کړ؛ ځکه دا شورا کولى شي چې له درېيو برخو څخه د دوو برخو په رايو پرېکړه وکړي.
خو د اساسي قانون پر تطبيق د څار کمېسيون، د ملي شورا دوبنيو رخصتيو کې حکومت ته مشوره ورکړه چې بل فرمان دې صادر کړي او پرته له دې چې ملي شورا ته واستول شي، د اجرا وړ دې وګرځي؛ ځکه ولسي جرګه نه شي کولى د تقنيني دورې په وروستي کال کې د ټاکنو قانون په اجنډا کې شامل کړي.
ولسي جرګه کې د ميدان وردګو استازي غلام حسين ناصري د جرګې نننۍ ناسته کې وويل: "درېيم فرمان د اساسي قانون د ٧٩مې مادې خلاف دى او د ملي شورا د فعاليت پرمهال صادر شوى دى."
نوموړي وويل چې درېيم فرمان، د دوبي له رخصتيو څخه دوه ورځې وروسته د وږي په اولسمه صادر او د ولسمشر له لوري لاسليک شو، چې هېڅ قانوني اساس نه لري.
د اساسي قانون په ٧٩مه ماده کې راغلي: "حكومت كولاى شي د ولسى جرګې د تعطيل په حالت كې له بودجې او مالي چارو پرته، د بېړنۍ اړتيا پر اساس تقنيني فرمانونه ترتيب كړي. تقنيني فرمانونه د جمهور رئيس تر توشيح وروسته د قانون حكم پيدا كوي. تقنيني فرمانونه بايد د ملي شورا د لومړۍ غونډې تر جوړېدو وروسته د دېرشو ورځو په اوږدو كې هغې ته وړاندې شي او كه د ملي شورا له خوا رد شي، خپل باور له لاسه وركوي."
ناصري د ملي يووالي حکومت د خلکو او قومونو ترمنځ بې اتفاقي ته په لمن وهلو تورن کړ، د ټاکنيزو حوزو د يوې چوکۍ سيستم په اړه يې وويل: "حکومت چې د ٣٤ حوزو د مديريت او ادارې توان نه لري، څرنګه له بوختياوو سره، سره کولى شي چې ٢٥٠ ټاکنيزې حوزې مديريت کړي."
هغه زياته کړه: "د ټاکنيزو حوزو کوچني کول به خلک په خپلو کې اخته کړي او کورنۍ جګړې ته د لمن وهلو يوه څه به وي؛ دا پرېکړه د کومو شمېرو له مخې شوې ده، يو څوکۍ سيستم ستونزه نه هواروي، بلکې حکومت ته به نورې ستونزې هم را وټوکوي."
خو ولسي جرګه کې د کابل خلکو استازې شينکۍ کړوخېل وويل: "نن د افغانستان نيمايي ولس پارلمان کې استازى نه لري."
هغې زياته کړه چې د ټاکنيزو حوزو په کوچني کېدو، ټاکنو کې عدالت خوندي کېږي او بايد وکيلان د خپلو شخصي ګټو لپاره د اصلاحاتو او ټاکنو د ترسره کولو مخه ډب نه کړي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن