کابل (پژواک،٢٢ وږى ٩٥): پخواني ولسمشر حامد کرزي په جګړو کې له ښکېلو غاړو او په ځانګړي ډول له طالبانو غوښتي، چې جنګ پرېږدي او د سولې راوستو لپاره له خپل ولس سره مل شي.
نوموړي دغه څرګندونې د لوى اختر د رارسېدو له امله د مبارکۍ په پيغام کې کړې دي.
د ده له دفتر څخه پژواک خبري اژانس ته په رالېږل شوې خبرپاڼه کې، نوموړي ټولو افغانانو او د نړۍ مسلمانانو ته د اختر مبارکې وړاندې کړې ده.
په خبرپاڼه کې د کرزي له خولې راغلي، چې په هېواد کې روانه جګړه د پردیو د ګټو او اهدافو لپاره ورځ تر بلې زور اخلي او د افغانستان خلک د دغې تپل شوې جګړې قربانیان دي، نو په کار ده چې په هوښیاري او دقت او ملي ګټو ته په پام سره، خپل ګران هېواد له روانو جګړو او ناخوالو وژغورو.
هغه زياتوي: "په جګړه کې له ټولو ښکېلو غاړو غواړم، چې له جګړې او ورور وژنې لاس واخلي او ټول سره یو ځای د پردو د جګړې د ختمېدو او د سولې د راوستو لپاره کار وکړي او یو ځل بیا د طالبانو د تحریک پر مشرانو غږ کوم، چې جنګ پرېږدي او په هېواد کې د سولې د راوستو لپاره له خپل ولس سره مل او همکار شي، څو د ټولو افغانانو په کامل اتحاد او اتفاق کې ګران هېواد د پردیو له مداخلو او منګولو وژغورو."
نوموړي د لوی خدای (ج) له درباره غوښتي، چې د افغانستان سرلوړى او باعزته ملت د اختر شپې ورځې په خوښۍ ولمانځي او په هېواد کې د تلپاتې سولې او ثبات د ټینګښت لپاره تر بل هر وخته متحد او یو موټى شي.
پخواني ولسمشر کرزي په داسې حال کې له طالبانو د سولې کولو غوښتنه کړې، چې دې ډلې په دې وروستيو کې د هېواد د پلازمېنې په ګډون په بېلابېلو سيمو کې خپلو بريدونو ته زور ورکړى دى.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن