کابل (پژواک، ١٣ ليندۍ ٩٥): د افغانستان په اړه د استانبول د پروسې د بهرنيو چارو وزيرانو په کچه د اسيا زړه کنفرانس د هندوستان په امرتسر ښار کې پيل شو.
د افغانستان د بهرنيو چارو وزارت سياسي مرستيال حکمت خليل کرزي د ليندۍ په ١٣مه، په ټولنيزه شبکه ټويټر کې ليکلي، چې دى او د هند د بهرنيو چارو وزارت مرستيال جى شينکر په ګډه ددې کنفرانس مشري کوي .
هغه زياته کړه چې ددې کنفرانس په پاى کې به يوه ګډه اعلاميه هم خپره شي.
په دې دوه ورځني کنفرانس کې چې نن د ليندۍ په ١٣مه، پيل شو، د شاوخوا ٤٠ هېوادونو او نړيوالو سازمانونو د استازو ترڅنګ د افغانستان ولسمشر اشرف غني او د هندوستان لومړى وزير نريندرا مودي هم په کې ګډون کوي.
هندي رسنيو خبر ورکړى چې په امرتسر ښار کې ددې کنفرانس لپاره کلک امنيتي تدابير نيول شوي دي.
سرچينې زياته کړې چې په دې کنفرانس کې به دافغانستان او د سيمې د سولې او ثبات په اړه هم خبرې وشي.
د استانبول پروسې د اسيا زړه کنفرانس په ٢٠١١ کال کې په دې موخه جوړ شوى، چې په افغانستان او د سيمې نورو هېوادونو تر منځ د ترهګرۍ، سخت دريځۍ او غربت په له منځه وړو کې همکارۍ زياتې شي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن