لښکرګاه (پژواک،۲٣مرغومی۹۵): په هلمند کې د پوهنې رياست چارواکي وايي چې له اوو کلونو وروسته ورته د ښوونځيو زرګونه ټوکه کتابونه ورسېدل.
د هلمند د پوهنې رييس قدرت الله يعقوبي د مرغومي په٢٣مه پژواک خبري اژانس ته وويل چې له اوو کلونو وروسته ورته د ښوونځيو څلور زره او سل کارتنه کتابونه رسېدلي دي.
د هغه د معلوماتو له مخې، په هر کارتن کې له ٦٠ څخه تر سل ټوکه پورې کتابونه دي چې په دې کتابونو کې له لومړي ټولګي څخه نيولې تر دوولسمه پورې ټول کتابونه شته.
هغه زياته کړه: (( په تېرو څو کلونو کې زموږ زده کوونکي له دې کتابونو څخه بې برخې وو خو اوس يې نوره ستونزه حل شوه.))
يعقوبي وايي چې ډير ژر به د دې کتابونو وېش په مرکز لښکرګاه او ولسواليو کې پيل کړي.
ده وويل چې د دې کتابونو د لېږد کرايه د کندهار ولايت سوداګر حمکت الله ښادمن ورکړې ده.
په دې غونډه کې د هلمند د ولايتي شورا رييس کريم خان اتل وويل چې په ښوونځيو کې د کتابونو نشتوالي د زده کړو بهير له ستونزو سره مخ کړى وو.
هغه وويل: (( تر دې وروسته له خيره سره دغه ستونزه هواره شوه.))
اتل وايي چې تر دې وړاندې يو شمېر کسانو د خپلو شخصي ګټو په موخه ځينې کتابونه په بازار کې پلورل او زده کوونکو ته يې نه ورکول.
دغه راز د لښکرګاه ښار د دوستۍ لېسې د ١٢ټولګي زده کوونکي فريدون پژواک ته وويل چې په تېرو څو کلونو کې د کتابونو د نشتون له امله له ګڼو ستونزو سره مخ وو.
هغه خوښي وښوده چې تر دې وروسته به يې ستونزې هوارې شي.
د يادونې ده چې د روان کال په اوږدو کې په هلمند کې د جګړو له امله ګڼ شمېر ښوونځي وتړل شول.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن