کابل (پژواک، ٣٠ کب ٩٥): د ولسي جرګې يو شمېر غړي د سرپرست وزيرانو د کار پر دوام سخته نيوکه کوي او په هېواد کې د بهرنيو ځواکونو د ډېرولو په اړه د افغانستان د بهرنيو چارو وزير څرګندونې غيرمسوولانه بولي.
د افغانستان د بهرنيو چارو وزير صلاح الدين رباني، پرون کابل کې ويلي چې افغانستان کې د بهرنيو ځواکونو د ډېرښت په اړه د نړيوالو ځواکونو د قوماندان جنرال جان نيکلسون له طرحې ملاتړ کوي.
افغانستان کې د نړيوالو ځواکونو قوماندان جنرال جان نيکلسون څه موده وړاندې د امريکا سنا جرګې ته ويلي و، افغانستان کې د جګړې وضعيت د بدلون لپاره نورو څو زره زياتو ځواکونو ته اړتيا ده.
خو د ولسي جرګې د بدخشان استازي زلمي مجددي د يادې جرګې په نننۍ ناسته کې وويل: "ښاغلي رباني هېواد کې د بهرنيو ځواکونو د زياتوالي په اړه غيرمسوولانه خبرې کړې دي."
هغه زياته کړه، افغانستان کې د بهرنيو ځواکونو د شتون زياتوالى د هېواد د امنيت په ټينګښت کې کوم مثبت اغېز نه لري.
نوموړي وويل، افغان مشران بايد د هېواد د امنيتي ځواکونو پر ډېر تجهيز او سمبالښت ټينګار وکړي او د هېواد امنيتي او دفاعي ځواکونه د بې کفايتۍ له حالت راوباسي.
د ولسي جرګې لومړى نايب همايون همايون چې نن يې د يادې جرګې مشري پر غاړه درلوده، وويل: "ښاغلي رباني د دې واک نه لري چې د افغان دولت له ادرسه د امريکايي ځواکونو د زياتولو په اړه څرګندونې وکړي."
هغه زياته کړه: "بهرنيو چارو وزير د دې حق نه لري، چې د بهرنيو ځواکونو د ډېرښت او نه ډېرښت غوښتنه وکړي، دا د افغانانو واک دى، له وزير صاحب غواړو چې خپله دنده وپېژني او له افغانانو استازيتوب ونه کړي."
سرپرستي
ولسي جرګه کې د غزني استازي محمد عارف رحماني وويل، د سرپرست وزيرانو د کار دوام غيرقانوني دى او جرګې ته د وزارتونو لپاره بايد ژر تر ژره نوماندان ور وپېژندل شي.
دا په داسې حال کې ده، چې د يادې جرګې مشر عبدالرووف ابراهيمي د روانې مياشتې په ٢٥ مه نېټه ويلي، چې جرګې ته به ډېر ژر د باور رايو ترلاسه کولو لپار ځينې نوماند وزيران ورمعرفي شي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن