کابل (پژواک، ٣ ورى ٩٦): د افغانستان د سوداګرۍ او صنايعو خونه وايي، د تورخم لارې بندېدو له امله افغان سوداګرو ته ٨٠ مليون ډالره او پاکستاني سوداګرو ته ١٨٠ مليون ډالره زيان اوښتى دى.
د تورخم لاره د سوداګريزو توکو او مسافرو په مخ د پاکستان حکومت له لوري د ١٣٩٥ کال د کب مياشتې له پيل د روان کال د وري مياشتې تر لومړۍ نېټې پورې تړلې وه.
د افغانستان د سوداګرۍ او صنايعو خونې مالي او اداري مرستيال محمد توفيق داوري، نن په کابل کې د "تر ټولو ښه دي، افغاني دي" نوم لاندې د يوه درې ورځني نندارتون د پرانېستې په مراسمو کې د خبرو پر مهال وويل، د تورخم لارې د بندېدو له امله؛ د فابريکو خوراکي توکي، خام او نيمه خام توکي د تورخم دروازې هغې خوا ته بند پاتې شوي وو، چې له امله يې افغان سوداګرو ته اتيا مليون ډالره زيان اوښتى دى.
د سوداګرۍ او صنايعو خونې مرستيال زياته کړه، په دغه موده کې د لارو بندېدو له امله پاکستاني سوداګرو ته هم ١٨٠ مليون ډالره زيان اوښتى دى.
نوموړي وويل، چې د "ډېر ښه دي، افغاني دي" تر نوم لاندې د کورنيو توليداتو نندارتون يې کورنيو توليداتو ته د حکومت او خلکو د پام راګرځولو، د مارکېټ د اړتياو تثبيت او په کورنيو بازارونو کې د تقاضا کچې ټاکلو په موخه ترسره کړى دى.
د سرچينې د معلوماتو له مخې، په ياد درې ورځني نندارتون کې د ١٠٤ فابريکو او شرکتونو توليدات نندارې ته اېښودل شوي دي.
نوموړي د دا ډول نندارتونو ترسره کول له کورنيو توليداتو څخه د ملاتړ او ګټې اخيستو په برخو کې مهم وبلل او زياته يې کړه، له کورنيو توليداتو ملاتړ؛ اقتصادي، سياسي، نظامي او نورو برخو کې د ثبات د رامنځته کېدو لامل کېږي.
د زېربناو په برخه کې د ولسمشرۍ ماڼۍ سلاکار محمد همايون قيومي هم د يوه با ثبات او خپلو پښو ولاړ افغانستان لپاره د دا ډول نندارتونو ترسره کول مهم وبلل او ويې ويل، حکومت هڅه کوي چې په کورنيو قراردادونو کې ډېره ونډه کورنيو توليداتو ته ورکړي.
د سوداګرۍ او صنايعو وزارت سوداګريز معين عبدالباري رحمان د نندارتون د پرانېستې په مراسمو کې وويل، حکومت د کورنيو توليداتو د کيفيت ښه والي لپاره هلې ځلې کوي، څو له دې لارې په نړيوالو بازارونو کې غوره سيالي وکړي.
د هغه په وينا، حکومت بايد د پانګوالو د برېښنا اړتيا پوره کولو او د برېښنا بيې د راټيټولو په برخو کې هلې ځلې وکړي.
د ياد نندارتون ننداره کوونکو هم له کورنيو توليداتو په ګټې اخيستو ټينګار وکړ.
د دغه نندارتون يوې ننداره کونکې ريحانې فرهمند پژواک خبري اژانس ته وويل: "زه په ډېر شوق او لېوالتيا سره دغه نندارتون ته راغلې يم، څو خپل کورنيو توليدات پکې وپېرم."
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن