غزني ښار(پژواک،١٧غبرګولى٩٦): د غزني د جاغوري ولسوالۍ په يوه لېسه کې ٣٠ نجونې مسمومې شوې دي.
د غزني د پوهنې رييس محمد عابد عابد د غبرګولي په ١٧مه پژواک خبري اژانس ته وويل چې د جاغوري ولسوالۍ د شاه يار سلطان المتو لېسې ٣٠ نجونې مسمومې شوې دي.
هغه وايي چې د دې پېښې لامل تر اوسه نه دى معلوم، خو کېداى شي د هوا د ګرمېدو له امله رامنځته شوى وي.
ده وويل چې نجونې روغتون ته لېږدول شوي او د ټولو روغتيايي وضعيت د ډاډ وړ دى.
د سيمې يوتن اوسېدونکي محمد حسين هم ياده پېښه تاييد کړه خو ويې ويل چې په دې سيمه کې دومره ګرمې نشته چې له امله يې څوک مسموم شي.
هغه زياته کړه: (( د ښوونځي په شاوخوا کې کوم ډول ګاز استعمال شوى، ځکه ځينو نورو کسانو يې هم بوى حس کړى دى.))
ده هم وويل چې نجونې د ولسوالۍ روغتون ته بيول شوې وې او اوسمهال يې روغتيايي وضعيت د ډاډ وړ دى.
دغه راز د پوهنې وزارت د خپرونو مسوول کبير حقمل هم په خپله ټويټر پاڼه کې ليکلي چې د غزني په جاغوري ولسوالۍ کې ٣٥ نجونې مسمومې شوې دي.
هغه په دې اړه نور جزئيات نه دي خپاره کړي.
د يادونې ده چې څو ورځې وړاندې هم د غزني ښار د خاک غريبا لېسې پنځوس نجونې مسمومې شوې وې.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن