پل علم

 د تلې ٢٣مه ، پژواک خبري اژانس

 د لوګر د مرکز او محمداغۍ ولسوالۍ په يوشمېر کليو کې طالبانو د شپې پاڼو له لارې خلکو ته په ټولټاکنوکې د نه ګډون ګواښ کړى دى . 

دغه شپې پاڼې تېره شپه ، د شاوخوا ٣٠ کليو  د جوماتونو ، کورونو او هټيو پر دروازو سريښ شوې دي .

په  شپې پاڼې کې چې پر سرکې  يې اسلامي امارت او د لوګر د امربالمعروف رياست ليکل شوي ، راغلي چې هرچا (  نر وي که ښځه )  د انتخاباتو په پروسه کې ګډون وکړ نو بريد به پرې وشي .

 شپې پاڼو کې همدارنګه له خلکو غوښتنه شوې چې له ملي اردو او دملي پوليسو له ليکو څخه راووځي او د طالبانو ملاتړ وکړي .

 د پل علم د دادوخيلو کلي اوسېدونکي ٢٢ کلن عبدالله پژواک خبري اژانس ته وويل چې ددوى په کلي کې  شپې پاڼې د شپې شاوخوا لس بجې د مخ پټو موټر سايکل سپرو لخوا لګول شوي او په لاسي لاوډ سپيکرونو يې ګواښ کړى چې که چا دا پاڼې لرې کړې نو سزا به وويني .

 په پل علم کې د ټولټاکنو دخپلواک کميسيون د څانګې مشر فضلي ، پژواک ته وويل چې شپې پاڼو په نوم ليکنه کې د خلکو ٣٠% ونډه ټيټه کړې ده .

 هغه وويل چې دوى ته نن سهار د لوګر د امنيه قوماندانۍ لخوا د شپې پاڼو يوه کاپي را لېږل شوې ده .

 د نوموړي په وينا امنيه قوماندانۍ له دغې پاڼې سره يوه بل ليک هم راستولى او ويلي دي چې د ټولټاکنو کارکوونکي دې لرو سيمو ته نه ځي او خپل ځانونه دې  وساتي .

هغه داهم وويل چې د شپې پاڼو له وېشلو سره سم يو شمېر کارکوونکيو دندې پرېښې دي .

هغه زياته کړه : (( که امنيت ته پام ونشي نود نوم ليکنې بهير به له ډېرو ستونزو سره مخ شي . ))

 هغه داهم وويل چې دغه شپې پاڼې نن سهار د امنيه قوماندانۍ پوليسو راټولې کړې دي .

د نوموړي د څرګندونو له مخې ، دامهال د لوګر په مرکز ، محمداغه ، خوشي ، بره کي برک او څرخ ولسواليو کې دنوم ليکنې ١٢ مرکزونه فعال دي او په خروار ولسوالۍ کې د ناامنيو له وېرې دغه شان مرکز نه شته .

د نوم ليکنې بهير د لوګر په ګډون په  ١٤ ولايتونو کې د تلې په ١٥ مه ،   پيل شوى دى .

 د نوم ليکنې د پيل په سبا د ميدان وردګوولايت ، جلريز او جغتو هغه  ولسوالۍ ګڼل شوې وې  چې د ناامنيو له وېرې په کې  د نوم ليکنې بهير  نه و پيل شوى ، خو اوس دغه لړۍ لوګر ته هم غځېدلې ده .

 د پل علم په بي بي امنه ليسه کې د نوم ليکنې يوې  کارکوونکې مريم ، پژواک ته وويل چې  دلته د امنيتي اندېښنو له امله د کليوالو او په ځانګړې توګه د مېرمنو ونډه ډېره کمه ده  .

همدارنګه د حضرت عمر فاروق په نوم د پل علم په يوه بله لېسه کې د نوم ليکنې يوه کارکوونکي ايمل پژواک ته وويل چې نن هيڅوک نوم ليکنې ته نه دي راغلي .

 د لوګرامنيتي چارواکي په دې اړه خبرو کولو ته زړه نه ښه کوي .

 که څه هم تراوسه د نوم ليکنې په کوم مرکز بريد نه دى شوى خو د روانې مياشتې په ٦ مه ، د کونړ- نورستان په سرحدي سيمه کې د نوم ليکنې تبليغاتې پاڼې سوځول شوې وې .