کابل

د لړم ١٧مه، پژواک خبري اژانس

د ګلبدين حکمتيار پرمشرۍ  د دولت مخالفې ډلې، د ميدان وردګو ولايت له جلرېز ولسوالۍ څخه د ټاکنو د خپلواک کمېسيون يو کارکوونکى او د هغه موټر چلوونکى وتښتول.

د ميدان وردګو د والي وياند آدم خان سيرت د لړم په ١٧مه، پژواک خبري اژانس ته وويل چې دغه پېښه تېره ورځ د جلرېز ولسوالۍ د عمومي سړک په اوږدو کې رامنځته شوې ده .

هغه د تښتول شوي کس نوم وانه خيست، خو زياته يې  کړه چې تښتول شوى تن د نوم ثبتولو او د رايو د کارتونو د وېشلو د برخې کارکوونکى دى.  

د سيرت د معلوماتو له مخې، تښتوونکيو د هغه د نوم ثبتولو وسايل سوځولي دي .

خو قاري منصور، چې ځان د ګلبدين حکمتيار پرمشرۍ د حزب اسلامي د ډلې وياند بولي، له يوه نامعلوم ځاى څخه د ټېلېفون په کرښه پژواک خبري اژانس ته وويل چې دوى د ټاکنو د خپلواک کميسيون درې تنه تښتولي دي .

د يادونې وړ ده ، چې د ولسمشرۍ د را روانو ټاکنو لپاره د نوم ثبتونې او د رايو د کارتونو وېش، په دې وروستيو کې پيل شوى دى .

ټاکل شوې ده ، چې دغه ټاکنې په راتلونکي  کال کې تر سره شي .

د يوشمېر سياسي څېړونکيو په وينا، کېداى شي يادې شوې ټاکنې په هېواد  کې د روانو ناامنيو له امله، په خپل وخت ترسره نشي .