کابل

د زمري لومړۍ، ١٣٨٩، پژواک خبري اژانس

په افغانستان کې د رسينو د څار ادارې له خوا په نوي راپور کې د ژورنالېستانو له قوله ويل شوي،چې د رسنيو په عالي شورا کې د دوى ونډه کمه ده.

دغه راپور، چې د ژورنالېستانو پر وړاندې د ګواښونو او پرمختګونو په اړه خپور شوى، د رسنيو دعالي شورا جوړېدل يې يوه ښه لاسته راوړنه بللې، خو د ژورنالېستانو په کمه ونډه يې نيوکه کړې ده.

دغه شورا له زيات ځنډ وروسته د روان کال د غبرګولي په ١٩مه، جوړه شوه.

په دغه شورا کې د اطلاعاتو او کولتوروزير اود مخابراتو وزارت د مسلکي معين په غړيتوب سربيره، د سترې محکمې، د عدليې وزارت او عالمانو شورا يو يو استازى او د مشرانو جرګې، ولسي جرګې، د مدني ټولنو او ژورنالېستانو له ټولنو دوه دوه استازي، د درېو کلونو لپاره غړيتوب لري.  

په خپاره شوي راپور کې د ژورنالېستانو له قوله ويل شوي،چې دغه شورا د رسنيو او ژورنالېستانو کارونه سره منظموي او بايد دوى ته پکې زياته ونډه ورکړل شوې واى.

په دغه شورا کې د ژورنالېستانو د کمې ونډې په اړه د افغانستان د ژورنالېستانو د ملي ټولنې مشر عبدالحميد مبارز پژواک خبري اژانس ته وويل چې په دې کې هيڅ شک نشته ، چې د رسنيو په عالي شورا کې د ژورنالېستانو ونډه کمه ده.  

د مبارز په خبره، په دغه شورا کې د ملي شورا دومره زياته ونډه هيڅ قانوني توجيه نه لري.

دى وايي چې د ملي شورا پرځاى بايد دغه ونډه هنرمندانو، ژورنالېستانو او نورو اړونده مراجعو ته ورکړل شوې واى.

د مبارز د څرګندونو له مخې، ولسي جرګې بايد دا کار نه واى کړى او نه په دغه شورا کې ددوى دومره ونډې ته اړتيا ليدل کيږي.

خو د ولسي جرګې د تقنين د کمېسيون غړى فضل الله مجددي د مبارز خبرې په کلکه ردوي. نوموړي په دې اړه پژواک خبري اژانس ته وويل چې ملي شورا د ولس استازيتوب کوي او ولس حق لري ، چې خپل استازي يې په دغه شورا کې وي.

د مجددي په خبره، د رسنيو تر دغه وروستي قانون وړاندې په هغه نورو قوانينو کې حکومت دوى ته د دا دوه کسانو حق هم نه و، ورکړى.

د ده په خبره،دملي شورا د ا څلورکسه ونډه کوم امتياز نه دى، چې ولسي جرګې ځانته ورکړى، بلکې دا يو مسووليت دى .  

که څه هم چې ژورنالېستان وايي چې د رسنيو په عالي شورا کې د دوى ونډۀ کمه ده ، خو لاهم د ژورنالېستانو د ټولنو له خوا خپل استازي دغې شورا ته نه دي معرفي شوي.

د اطلاعاتو او کولتوروزارت چارواکي وايي چې د هغوى ترمعرفۍ پورې د ځای تش نه پاتې کیدو په موخه په موقته توګه فرزانه حبیب اومحمد حنیف شیرزاد چې په ملي راډيو تلويزيون کې دندې لري د ژورنالېستانو د استازو په توګه د رسنيو عالي شورا ته انتصاب شوي دي.