کندهار

د زمري ٤مه، ١٣٨٩، پژواک خبري اژانس

د کندهار ښار په احمد شاهي لوبغالي کې د کندهار، فراه او د پاکستان د بلوچستان ايالت د چمن ښار د فوټبال د څلورو لوبډلو تر منځ شپږ ورځنۍ سيالۍ تېره ورځ مازيګر ناوخته پيل شوې.

د کندهار ولايت د سپورټ آمريت وايي چې دغه شپږ ورځنۍ سيالۍ يې د امريکا د متحده ايالاتو د پوهنتون د افغان استاد ډاکټر عالم پايند په نوم نومولي دي.

د سپورټ آمر محمد الله ګلالي نن د زمري په ٤مه، پژواک خبري اژنس ته وويل چې د دې ټورنمنټ لومړۍ لوبه تېره ورځ ماښام مهال د کندهار د عينو او د فراه ولايت د لوبډلو تر منځ وشوه.

هغه زياته کړه، چې ياده شوې لوبه څلور د صفر په مقابل کې د کندهار د عينو لوبډلې په بريا پاى ته ورسېده.

د عينو په نوم د فوټبال لوبډلې يوه لوبغاړي جاوېد احمد پژواک خبري اژانس ته وويل، چې ددې ټورنمنټ لپاره يې ښه تيارى نيولى دى.

د هغه په وينا، هڅه کوي، د تېرې ورځې په شان د ټورنمنټ په وروستۍ لوبه کې خپل ځانونه ښه وځلوي.

ټاکل شوې ده، نن مازيګر د پاکستان د بلوچستان ايالت د چمن او کندهار ولايت د شېرزي لوبډلو ترمنځ لوبه وشي.

په کندهار کې که څه هم وروستيو ناامنيو پر تفريح او سپورټ سيورى غوړولى، خو د دې ولايت ډېر شمېر ځوانان له لوبو او ورزش سره مينه لري او په پراخه کچه د لوبو نندارې ته راځي.