کندهار ښار

د زمري ٥مه، ١٣٨٩، پژواک خبري اژانس

د کندهار ښار په لومړۍ ناحيه کې تېر ماخوستن د ماين د چاودنې له امله پنځه تنه ټپيان شول.

د کندهار ولايت مطبوعاتي دفتر له خوا د زمري په ٥مه، پژواک خبري اژانس ته په رالېږل شوې خبرپاڼه کې ويل شوي، چې چاودنه د ښار د لومړۍ ناحيې اړونده د حضرت جي بابا په سيمه کې د شپې په اتو بجو وشوه.

سرچينې زياته کړې، چې د چاودنې له امله پنځه ملکي وګړي ټپيان شوي، چې ميرويس روغتون ته وړل شوي دي .

 د حميدالله په نامه د پېښې يوه عيني شاهد پژواک اژانس ته وويل، چې چاودنه د ملي امنيت پر مامورينو شوې ده، خو د مرګ ژوبلې په اړه يې معلومات نه درلودل.

وسلوالو طالبانو تراوسه په دې اړه څه نه دي ويلي.