غزني ښار

د زمري ٧مه، ١٣٨٩ ، پژواک خبري اژانس

د غزني د اندړو ولسوالۍ په سيني کلي کې د ملي اردو او پولنډي ځواکونو پر نوي جوړېدونکي پوځي کمپ بريد کې دوه پولنډي سرتېري ټپيان شول.

د اندړو ولسوال شېرخان يوسفزى وايي، چې پر نوي پوځي کمپ نن له غرمې مخکې د درنو او سپکو وسلو بريد وشو.

هغه د زمري په ٧مه، پژواک خبري اژانس ته وويل، چې په بريد کې دوه پولنډي سرتېري ټپيان شوي او پوځي کمپ ته نږدې د همدې سرتېرو يو ټانک هم پر ځمکني ماين ختلى دى، چې يواځې ټانک زيانمن شوى او نوره مرګ ژوبله نه لري.

په پام کې ده، چې د غزني _پکتيکا ترمنځ غځېدلي سړک د خونديتوب په موخه دغلته د ملي اردو او بهرنيو ځواکونو ګډه قرارګاه جوړه شي.

د سيني کلى د اندړو ولسوالۍ شمال لور ته په درې کيلومترۍ کې د غزني - پکتيکا لارې ته څېرمه پروت دى.

د سيمې يو اوسېدونکى محمد رفيق وايي، چې تر يو ساعت پورې د دواړو لوريو ترمنځ ډزې ردې بدلې شوې، خو وروسته چورلکې راغلې او بيا جګړه ارامه شوه.

د ده په خبره، د لږې شېبې لپاره دوه چورلکې د پوځي مرکز ترڅنګ کېناستې او بيا وروسته پورته شوې، چې د ده په ګومان، ژوبل کسان يې پورته کړل.

وسلوالو طالبانو د بريد مسووليت پر غاړه واخيست، ذبيح الله مجاهد وايي، چې پردې ګډ پوځي مرکز بريد کې يې دولتي او بهرنيو ځواکونو ته درنه مرګ ژوبله اړولې ده.

د يادونې وړ ده، چې دوه ورځې مخکې هم په همدې ولايت کې د يوې چاودنې له امله اوه پولنډي سرتېري ټپيان شوي وو.

پولنډ په افغانستان کې ٢٦٠٠ سرتېري لري، چې ډېرى يې په غزني ولايت کې مېشت دي او تراوسه يې ١٩ سرتېري وژل شوي دي.