کلات

د زمري ٧مه، ١٣٨٩، پژواک خبري اژانس

د زابل او نيمروز ولايتونو په دوو بېلا بېلو چاودنو کې چې پر ملکي موټرو شوې، شپږ ملکي وګړي ووژل شول.

د زابل د والي وياند محمد جان رسوليار د زمري په ٧مه، پژواک خبري اژانس ته وويل، چې پرون مازيګر د ميزانې ولسوالۍ د سعدالله خان کلا په سيمه کې د ملکي وګړيو پر يوه موټر د ماين چاودنه وشوه.

هغه زياته کړه، چې د چاودنې له امله څلور ملکي وګړي ووژل شول او درې نور ټپيان شول، چې د ايساف ځواکونو له خوا د کندهار نظامي روغتون ته يوړل شول.

په کابل کې د ايساف ځواکونو مطبوعاتي دفتر له خوا پژواک اژانس ته په رالېږل شوې خبرپاڼه کې هم، د ميزانې د چاودنې پخلى شوى دى.

سرچينې زياته کړې، چې ټپيان د دوى د سرتېرو له خوا روغتون ته وړل شوي دي.

د ايساف په خبرپاڼه کې دا هم ويل شوي، چې تېره ورځ د نيمروز په خاشرود ولسوالۍ کې هم د يوې چاودنې له امله دوه ملکي وګړي وژل شوي دي.

پرون سهار د نيمروز په دلارام ولسوالۍ کې د ملکي وګړيو پر يوه ٣٠٣ مو‌ټر د ماين د چاودنې له امله، ٢٥ ملکي وګړي ووژل شول او له ٢٠ زيات ټپيان شوي وو.

د يادونې وړ ده، چې په دې وروستيو کې د هېواد په بېلا بېلو سيمو کې د ماين چاودنو، بريدونو او بمباريو له امله د ملکي وګړيو د مرګ ژوبلې پېښې زياتې شوې دي.

د تېرې جمعې په ورځ د هلمند په سنګين ولسوالۍ کې د بهرنيو ځواکونو په يوه بريد کې ٥٢ ملکي وګړي ووژل شول .

د ملګرو ملتونو د يوه راپور له مخې، په روان زېږديز کال کې په  افغانستان کې امنيتي حالت د تېر کال په پرتله خراب شوى دى.

دغې ادارې ويلي، چې سږ کال د تېر کال په پرتله د ماين چاودنو په پېښو کې ٩٤ سلنه زياتوالى راغلى دى.

که څه هم افغان او نړيوال ځواکونه د ماين چاودنو د پېښو مسووليت پر وسلوالو طالبانو اچوي، خو طالبان بيا دغه ادعا ردوي او وايي، چې دوى چاودنې د ريموټ کنټرول په وسيله کوي او دوى خپله موخه سمه توګه په نښه کوي.