زرنج

د زمري ٨مه، ١٣٨٩ ، پژواک خبري اژانس 

د نيمروز ولايت د دلارام ولسوالۍ په نالان سيمه کې د سړک غاړې د ماين په چاودنه کې په يوه شخصي سراچه موټر کې دوه ملکي وګړي ووژل شول.

د نيمروز والي ډاکټر غلام دستګير ازاد د زمري په ٨مه، پژواک خبري اژانس ته وويل، چې ياده چاودنه تېره ورځ مازيګر رامنځته شوه.

د سرچينې د څرګندونو له مخې، په چاودنه کې وژل شوي کسان د خاشرود ولسوالۍ اوسېدونکي وو او غوښتل يې چې د دلارام مرکز ته ولاړ شي، چې له پېښې سره مخ شول.

دا په داسې حال کې ده، چې درې ورځې وړاندې هم په نالان کې د سړک غاړې د ماين په چاودنه کې د ښځو او ماشومانو په ګډون د يوه ٣٠٣ موټر له سپرليو څخه  ٢٥ تنه ووژل شول او شل نور ټپيان شول . 

د نيمروز امنيتي چارواکي وايي، چې په تېره يوه مياشت کې د دولت وسلوالو مخالفينو د د لارام د ښار له پنځه کيلومترۍ څخه د خاشرود تر دهمزنګ سيمې ١٤ تنه له موټرو ښکته کړي او له دولت سره د همکارۍ په تور يې وژلي دي . 

رامين