خدمات پژواک

بخش عکاسى پژواک

پوشش خبری انتخابات

صفحه ویژۀ معادن

Afghan Peace Process Special Page

خدمات پيام هاى تجارتى پژواک

Daily Newsletter

Language
Sending Time (GMT / Kabul time)

پکتيا کې د زون په کچه د توبرکلوز د تشخيص او درملنې مرکز پرانيستل شو

پکتيا کې د زون په کچه د توبرکلوز د تشخيص او درملنې مرکز پرانيستل شو

Feb 10, 2018 - 11:28

ګردېز(پژواک،٢١سلواغه٩٦): په پکتيا کې د سوېل ختيځ زون لپاره د توبرکلوز يا نري رنځ د تشخيص او درملنې عمومي مرکز رسما پرانيستل شو.

روغتيايي مسوولين وايي چې د دې مرکز له فعاليت سره به د يادې ناروغۍ تشخيص ډېر اسانه او مخنيوي به يې وشي.

د پکتيا د عامې روغتيا رييس ډاکټر ولايت خان احمدزي د سلواغې په ٢١مه پژواک خبري اژانس ته وويل چې دغه مرکز ته د يو، اېس، اى، ډي په مرسته د څه کم دوه ميليونه افغانيو په لګښت  د توبرکلوز د تشخيص عصري ماشينونه اخيستل شوي دي.

احمدزی وايي چې د ګردېز ښار له روغتونونو، کلينيکونو، درملتونونو او مشهورو ډاکټرانو سره يې هوکړه کړې چې د نري رنځ له ناروغ سره د مخ کېدو پر مهال يې دې مرکز ته معرفي کړي، ترڅو درملنه يې وشي.

نوموړي زياته کړه چې ياد ماشينونه له ناروغۍ سربېره دا هم معلوموي چې ناروغي په کومه کچه او له کومو درملو سره ښه کيږي.

ولايت خان احمدزي په پکتيا کې د نري رنځ د ناروغانو کره شمېره په ګوته نه کړه، خو زياته يې کړه چې د تېرکال په پرتله يې سږکال شمېره نوره هم لوړه شوې ده.

هغه زياته کړه: (( دلته به د ناروغانو وړيا درملنه کيږي او د ولسواليو خلک به هم راځي، هڅه کوو چې دا ماشينونه او اسانتياوې لا زياتې شي.))

د هېواد په کچه د نري رنځ د روزنې مسول ډاکټر محمدکمين ايوبي پژواک ته وويل چې د نري رنځ د معياري درملنې لپاره صحي کارکوونکو ته مشخصه او لا زياته روزنه ورکوي.

ايوبي وويل چې نری رنځ يوه ساري ناروغي ده او که په وخت يې درملنه ونه شي، نو ناروغ له ډېرو ستونزو سره مخ کوي.

نوموړی وايي: ((دا ناروغي سل فيصده د علاج وړه ده، خو شرط دا دی چې ناروغ بايد تر ټاکلې مودې منظمه درملنه وکړي او که داسې ونه شي، نو بيا مقاوم نری رنځ رامنځته کيږي، چې ډېر خطرناک او وژونکی دی.))

دغه راز د پکتيا مرستيال والي عبدالولي سهي د ياد روغتيايي مرکز پرانيسته د يوې ګواښوونکې ناروغۍ د درملنې لپاره ګټوره وبلله او د وسايلو په ښه ساتنه او زياتونه يې ټينګار وکړ.

سهي وايي:((د توبرکلوز تشخيص او مخنيوی ډېر مهم دی او نن د دې کار لپاره ډېر د خوښۍ ځای دی چې دغه مرکز  پرانيستل شو.))

د روغتياپوهانو د معلوماتو له مخې، چې دوه اوونۍ پرله پسې تبه، ټوخی او بلغم د نري رنځ عمده نښې دي او په دې حالت کې بايد روغتيايي مرکز ته مراجعه وشي. 

گزارش های مربوطه:

تبصره کنيد

اعلانات

Advertisement