د امام ابو حنیفه نندارتون؛ د ۵۰ میلیونه افغانیو توکي خرڅ او د ۴۵ میلیونه ډالرو قراردادونه شوي

[restrict paid="true"]

کابل (پژواک، د زمري لومړۍ نېټه ۱۴۰۲): د سوداګرۍ خونه وایي چې په کابل کې  د امام ابو حنیفه نندارتون کې د ۵۰ میلیونه افغانیو توکي خرڅ شوي او د ۴۵ میلیونه ډالرو واړه او غټ قراردادونه لاسلیک شوي.

د هېواد پلازمېنه کابل کې د امام ابو حنيفه (رح) دویم نړیوال نندارتون د زمري په لومړۍ نېټه د یو شمېر دولتي مسوولینو، ملي سوداګرو او پانګوالو په ګډون د یوې غونډې په ترڅ کې پای ته ورسېد.

د افغانستان د سوداګرۍ او صنعت وزارت سرپرست نورالدین عزیزي ددغه نندارتون په پای کې په یوه خبري غونډه کې وویل، چې د ورته نندارتونونو د دوام او لا معياري کولو په موخه ګړندۍ هڅې روانې دي او د افغانستان د توليداتو د معرفي کولو په موخه په نږدې راتلونکي کې قزاقستان ته سفر کوي.

عزیزي زیاته کړه، چې په قزاقستان کې د افغاني توکو د نندارې په موخه لسګونه غرفې په وړیا ډول د افغانستان په اختيار کې ورکړل شوې دي.

نوموړي همدارنګه وویل چې امريکا دې نور د افغانانو له کړولو څخه لاس واخلي او د هغوی خپلې پيسې دې بېرته ازادې کړي، ځکه چې  له دغو بنديزونو څخه تر ټولو ډېر ولس او خصوصي سکتور زیانمن کېږي.

د سوداګرۍ او صنعت وزارت سرپرست له هېوادوالو څخه غوښتنه وکړه، چې له داخلي توليداتو څخه ګټه واخلي، موږ يې د ښه کيفيت ډاډ ورکوو.

په ورته وخت کې دغه غونډې ته د رئيس الوزرا په رالېږل شوي پیغام کې ویل شوي، چې د دغه نندارتون په وسيله به د افغانستان ريښتينی انځور نړۍ ته وړاندې او پانګوال به دلته د پانګونې له ګڼو فرصتونو څخه خبر شي.

په پیغام کې همدارنګه ویل شوي، چې اسلامي امارت د بسيا افغانستان جوړولو لپاره مبارزه کوي او نړيوال دې هم افغانستان ته د خطر په سترګه نه بلکه د فرصت په سترګه وګوري.

رئيس الوزرا زیاته کړې، چې نړۍ دې د بنديزونو او فشار پر ځای خپلې اندیښنې او وړانديزونه د تفاهم او خبرو له لارې له اسلامي امارت سره شريکې کړي.

د افغانستان د سوداګرۍ او پانګونې خونې د مسوولینو په وینا په دغه نندارتون کې د شانګهای د سوداګرۍ خونې سربېره د پاکستان، ايران، ترکمنستان او ترکيې هېوادونو ۷۰ تنه ګډونوالو هم برخه درلوده.

سرچینې زیاته کړې، په دغه نندارتون کې چې یوه اونۍ يې دوام درلود د کابو ۵۰ میلیونه افغانیو په ارزښت نندارې ته اېښودل شوي توکي پلورل شوي او شاوخوا ۳۵۰ زره کسانو له دغه نندارتون څخه لیدنه کړې ده.

د سوداګرۍ خونې د مسوولینو د معلوماتو له مخې، په دې نندارتون کې سوداګرو په ۷۰۰ غرفو کې خپل توکي نندارې ته وړاندې کړې وو.

د سوداګرۍ او پانګونې خونې مرستیال محمد یونس مهمند دنندارتون په وروستي ورځ وویل چې یواځې ۷۰ غرفې، د پاکستان، ایران، ترکمنستان او ترکیې ته ّځانګړې شوې وې او هغوی پکې خپل تولیدات نندارې ته وړاندې کړل.

هغه زیاته کړه، چې په دې نندارتون کې د ۴۵ میلیونه امریکایي ډالرو په ارښت ۵۰۰ واړه او غټ تفاهم لیکونه لاسلیک شول او ۵۰ میلیونه افغانۍ توکي خرڅ شوي دي.

خالد محمد  شکیب احمدی چې په دې نندارتون کې یې خپل تولیدات او محصولات نندارې ته وړاندې کړې وو، دداډول نندارتونونو جوړول یې ښه اقدام وباله او زیاته یې کړه چې دې سره یې توکو ته بازار پیدا کېږي.

[/restrict]